Պատրաստ են հյուսիս-հարավ ճանապարհային միջանցքի երրորդ տրանշի նախագծերը. Գագիկ Բեգլարյան

Հայաստանի Հանրապետության տրանսպորտի և կապի նախարար Գագիկ Բեգլարյանը նոյեմբերի 21-ին ընդունել է «Ամբեր Կապիտալ ներդրումային կառավարում» ընկերության գլխավոր գործադիր պաշտոնակատար Ջոզեֆ Ուղուրլյանին: Հանդիպմանը ներկա էին նաև «Լեւոն Յակուբյան», «Սալինի Գրուպ» շինարարական կազմակերպությունների ղեկավարները:

Ջոզեֆ Ուղուրլյանը, ով «Ամբեր Կապիտալ ներդրումային կառավարում» ընկերության հիմնադիրներից է, նշել է, որ գործունեություն ծավալելով Հայաստանում, Լեռնային Ղարաբաղում և Սփյուռքում՝ իրենք հետաքրքրված են ՀՀ տրանսպորտի և կապի նախարարության համար առաջնահերթություն հանդիսացող Հյուսիս-հարավ ճանապարհային միջանցքի ներդրումային ծրագրով , ինչպես նաև Իրան-Հայաստան երկաթուղու կառուցմամբ:

Նախարարը շինարարական կազմակերպությունների ղեկավարներին տեղեկացրել է, որ Հյուսիս-հարավ ճանապարհային միջանցքի Առաջին տրանշի շինարարական աշխատանքների մեկնարկը տրվել է սեպտեմբերի 13-ին:

«Այժմ աշխատում ենք Երրորդ եւ Չորրորդ տրանշի ուղղությամբ։ Արդեն պատրաստ են Երրորդ տրանշի նախագծերը, որոնց համար մրցույթ կհայտարարվի 2013թ. գարնանը»,-նշել է Գագիկ Բեգլարյանը:

Նախարարը ներկայացրել է մայրուղու կառուցման ծրագրի կարեւորությունը, նպատակներն ու հեռանկարները:
Շինարարական կազմակերպությունների ներկայացուցիչներին հատկապես հետաքրքրել են Հյուսիս-հարավ մայրուղու Երրորդ տրանշի մրցույթի մանրամասները։

Անդրադառնալով Իրան-Հայաստան երկաթուղուն՝ Գագիկ Բեգլարյանը նշել է, որ մոտ ապագայում սկսվելու է երկաթուղու տեխնիկական ուսումնասիրությունը: Նախարարն ընդգծել է, որ երկաթուղու կառուցումը էական առաջընթաց կբերի Հայաստանի տնտեսությանը:
Հանդիպման ընթացքում կողմերը քննարկել են նաեւ փոխադարձ հետաքրքրություն ներկայացնող այլ հարցեր:

ՀՀ տրանսպորտի եւ կապի նախարարության լրատվական ծառայություն