Արարատի մարզպետը վերջապես հատկացրել է 11 երեխաների հորը խոստացված գումարը

Այսօր Մարդու իրավունքների պաշտպանին իրենց խորին շնորհակալությունը հայտնելու էին եկել 11 անչափահաս երեխաների հայր Մարտիկ Մելքոնյանն ու նրա կինը: Մարդու իրավունքների պաշտպան Կարեն Անդրեասյանի միջամտությամբ Արարատի մարզպետը նրանց հատկացրել է 300.000 դրամ գումար:

Դեռևս 2011թ.-ին Մարտիկ Մելքոնյանին բնակարան հատկացնելու համար «Ֆուլեր» տնաշինական կենտրոնին հանձնարարվել էր իրականացնել նրա տան շինարարությունը, որի ընդհանուր արժեքը կազմել էր 3.100.000 դրամ:

Ըստ պայմանավորվածության, Արարատի մարզպետարանը պետք է համաֆինանսավորեր նշված գումարի 10 %-ը, սակայն ֆինանսական միջոցներ չունենալու պատճառով գումարը չէր հատկացվել, փոխարենը՝ մարզպետարանը խնդրել էր Մարտիկ Մելքոնյանին այդ գումարն ինչ-որ կերպ վճարել հետագայում փոխհատուցելու պայմանով:

Մելքոնյանը դիմել էր Պաշտպանին՝ մարզպետարանի կողմից փոխահատուցվող գումարը ստանալու խնդրով:

Մարտիկ Մելքոնյանն ու նրա կինը իրենց շնորհակալությունն էին հայտնում նաև Պաշտպանի աշխատակազմի իրավապաշտպան Ռուզաննա Ղազարյանին, ով ամիսներ շարունակ հետևել և ուշադրության կենտրոնում էր պահել նրանց գործերի ընթացքը, շնորհակալություն էին հայտնում նաև ՀՀ տարածքային կառավարման նախարարին, Արարատի մարզպետին և Այգավան համայնքի ղեկավարին: