Լևոն Զուրաբյանը հորդորեց Վարդգես Գասպարիին՝ հանել Ծառուկյանի լուսանկարը (տեսանյութ)

Երեկ ՀԱԿ անդամ Վարդգես Գասպարիի ցուցապաստառները ՀԱԿ-ի բողոքի ակցիայի ժամանակ մի փոքր փոփոխության էին ենթարկվել, «խմբագրվել» էին, գրում է aravot.am-ը: Օրերս ԱԺ Դեմիրճյան փողոցում նա պատգամավորներին դիմավորում էր մի պաստառով, որտեղ կրիմինալի, օլիգարխիայի ներկայացուցիչների շարքում կար նաև ԲՀԿ առաջնորդ Գագիկ Ծառուկյանի լուսանկարը: Այդ օրը Վարդգես Գասպարին Aravot.am-ին պատմել է, որ իրեն մոտեցել են մի քանի ԲՀԿ-ականններ և դժգոհություն հայտնել, որ Գագիկ Ծառուկյանը Սամվել Ալեքսանյանի, Առաքել Մովսիսյանի շարքերում է՝ ըստ ցուցապաստառի: Իսկ երեկ արդեն նրա լուսանկարները հանվել էին: Որպես «գողական խուժան, կրիմինալ և օլիգարխ» մնացել էին Սամվել Ալեքսանյանի, Ռուբեն Հայրապետյանի և Վարդան Այվազյանի լուսանկարները:

Երեկ aravot.am-ի հարցին՝ Գագիկ Ծառուկյանի լուսանկարը ոնց որ դուրս է եկել Ձեր ցուցապաստառներից, ինչո՞ւ, ինչով է դա պայմանավորված՝ Վարդգես Գասպարին այսպես է բացատրել. «Այո: Շատ պարզ: Լևոն Զուրաբյանը ինձ հորդորեց, որ ներկա պահին պետքը չի: Ես էլ, որպես ՀԱԿ-ի անդամ, նաև իր վստահված անձ, իր հորդորը լսեցի»: Մեր դիտարկմանը՝ բայց չէ՞ որ Դուք ազատ քաղաքացի եք և Ձեր կարծիքն արտահայտելու իրավունք ունեք, Գասպարին պատասխանել է. «Այո, համաձայն եմ, բայց նաև՝ ՀԱԿ-ի անդամ»: Մեր դիտարկմանը, որ ենթարկվեցիք Լևոն Զուրաբյանին՝ նա պատասխանեց. «Չենթարկվեցի, ընդունեցի իր հորդորը: Չեմ կարծում, որ որևէ մեկը կարողանա ինձ ենթարկեցնել»: aravot.am-ը հետաքրքրվել է, թե նրա կարծիքը Գագիկ Ծառուկյանի մասին այնուամենայնիվ, մնում է նո՞ւյնը՝ Վարդգես Գասպարին ասել է, որ՝ այո: