Իսրայելի և «ՀԱՄԱՍ»-ի զինադադարի կետերը

Ցնծալի տոնակատարություններ են սկսվել Գազայի փողոցներում այն պահից, երբ ուժի մեջ է մտել Իսրայելի և Գազայի միջև կնքված զինադադարը՝ 8 օր տևած կատաղի կռիվներից հետո, հաղորդում է ֆրանսիական լրատվական France 24 գործակալությունը:

Համաձայն Իսրայելի և «ՀԱՄԱՍ»-ի միջև ձեռք բերված զինադադարի՝

1.Իսրայելը համաձայնվել է դադարեցնել ամեն տեսակի ագրեսիան ընդդեմ Գազայի հատվածի թե՛ ցամաքից, թե՛ ծովից և թե՛ օդից, այդ թվում սահմանային հարձակումները և դիտավորյալ սպանությունները:

2. Պաղեստինյան բոլոր ֆրակցիաները համաձայնվել են դադարեցնել բոլոր ռազմական գործողությունները ընդդեմ Իսրայելի Գազայից, այդ թվում հրթիռակոծումը:

3.Համաձայնագիրը նաև տրամադրում է 24 ժամ հանդարտեցման ժամանակահատված, որից հետո Իսրայելը հանձ է առնում բացելու սահմանային անցակետերը Իսրայելի և Գազայի հատվածի միջև ու թեթևացնելու ապրանքների վրա դրված և խիտ բնակեցված անկլավից ելումուտ անող մարդկանց տեղաշարժի սահմանափակումները:

Չորեքշաբթի օրվա զինադադարն ընդգրկում է 48-ժամյա լարված բանակցություններ, որի մասնակից են դարձել նաև ԱՄՆ Պետքարտուղար Հիլարի Քլինթոնը և ՄԱԿ-ի Գլխավոր Քարտուղար Բան Կի Մունը:

Հիշեցնենք, որ զինադադարն Իսրայելի և Պաղեստինի միջև հաստատվել է չորեքշաբթի օրը տեղական ժամանակով 21:00 (23:00) այն բանից հետո, երբ Իսրայելի պաշտպանության բանակը հրաման է ստացել դադարեցնել Գազայի հատվածում ռազմական գործողությունները և դադարել է պատասխանել Պաղեստինի կողմից արձակվող հրթիռային հարձակումներին:

Ամերիկա-եգիպտական միջնորդությամբ կայացած հաշտությունը հիմնված է «լռություն լռության դիմաց» սկզբունքի վրա: Փոխգնդակոծության հետևանքով կյանքից հեռացել է ավելի քան 162 պաղեստինցի և 5 իսրայելցի: Իսրայելական կողմը հարձակում է գործել Պաղեստինի ավելի քան 1.5 հազար օբյեկտի վրա, որին ի պատասխան՝ պաղեստինյան կողմն արձակել է 1.5 հազար հրթիռ, որոնք առաջին անգամ հասել են մինչև Թել Ավիվ և Երուսաղեմ: Օդային հարձակումները, սակայն, չվերածվեցին ցամաքային լայնածավալ հարձակման:

Երկար սպասված զինադադարի հայտարարությունն արվել է Կահիրեում Եգիպտոսի ԱԳ նախարար Մուհամմեդ Ամրի կողմից: