«ՀԺ». Աշոտյանի բոդիբիլդինգյան հետաքրքրությունները մարմնավորում են ստանում ի դեմս բուհերի պաշտոնյաների

Վերջին ամիսներին իր համարձակ ակցիաներով արդեն հայտնի դարձած «Հակահարված» art խումբը երեկ ԵՊՀ պատմության ֆակուլտետի շենքում (Սև շենք) բռնության է ենթարկվել: Ըստ «Հայկական ժամանակ»-ի' դեկան Էդիկ Մինասյանի ղեկավարությամբ' երիտասարդների մի խումբ նախ հրմշտել է «Հակահարվածի» անդամներին, իսկ հետո նրանք սկսել են ուժգին հարվածներ հասցնել Արտակ Գևորգյանին:

Փաստորեն, ՀՀ կրթության և գիտության նախարար Արմեն Աշոտյանի բոդիբիլդինգյան հետաքրքրությունները մարմնավորում են ստանում ի դեմս տարբեր բուհերի պաշտոնյաների: ԵՊՀ-ի պատմության մասնաշենքում իրականացվող ակցիայի էությունը եղել է հետևյալը. դասամիջոցին «Հակահարվածի» անդամները բարձրախոսով դիմել են ուսանողներին կոչ անելով այլևս չհանդուրժել երկրում տիրող ապօրինությունները: Վերոնշյալ միջադեպից հետո «ՀԺ» թղթակիցը դեկան Էդիկ Մինասյանին հարցրել է, թե որն է եղել միջադեպի պատճառը: Նրա պատասխանը ցնցող է: «Բա քաղաքական իշխանությունները տապալելու մասին կոչեր էին անում»,- ասել է նա: Իսկ ավելի ուշ այլ լրատվամիջոցների ներկայացուցիչների հետ զրույցում Մինասյանը հերքել է ծեծկռտուքի փաստը: «Այ մարդ, էդպիսի բան չի եղել, ես հո վայրենի չե՞մ: Ես ո՞ր մի ուսանողի նկատմամբ նման բան կարող եմ կիրառել: Իրենք են մտել, դասերը խանգարում են: Սուտ բաներ են տարածում, որովհետև իրենք էին հրմշտում էրեխեքին, էրեխեքն էլ հրմշտեցին, որ դուրս հանեն դրանց: Մտել են կորպուս ու միկրոֆոնները ձեոքներին կոչ էին անում տապալել և այլն, և այլն, դասն էին խանգարում: Ես էլ դուրս եկա ասում եմ հասկացեք, հիմնարկ է, դաս ենք անում և այլն, ասում է' բա դուք ով եք, ու գնում առաջ: Ես էլ... էրեխեքի հետ դուրս եկանք, որ չի կարելի, էլի, դուրս եկեք բայց որևէ միջադեպ, ծեծկռտոց, բան, տենց բաներ չի եղել»,-պնդել է դեկանը:

Մինչդեռ երեկ երեկոյան համացանցում է հայտնվել միջադեպի տեսագրությունը: Դրանում շատ պարզ երևում է, թե ինչպես է նախ, դեկանը հրմշտում ակցիա իրականացնող երիտասարդներին, ապա երիտասարդների մի խումբ շրջապատում է նրանց ու սկսում հարվածներ հասցնել:

Միջադեպից հետո «Հակահարված»-ի անդամները դեպքի վայր ժամանած ոստիկանների հետ գնացել են ոստիկանության Կենտրոնի բաժին' հանցագործության մասին հաղորդում տալու: Որոշ ժամանակ այդ «բարեկամական մթնոլորտում» մնալուց հետո երիտասարդներն անիմաստ են համարել դա անել: Մինչդեռ հրապարակված տեսանյութը լիովին բավարար է քրեական գործ հարուցելու և երիտասարդների նկատմամբ բռնություն գործադրող անձանց համապատասխան պատասխանատվության ենթարկելու համար: