«ՀԺ». Կառավարության ներկայացրած փաթեթը կասկածելի է

Ինչպես ամեն տարվա վերջերին, այս տարի էլ ՀՀ կառավարությունը ներկայացրեց հարկային մի շարք օրենքներում փոփոխություններ կատարելու նախագծերի փաթեթ, որը, պատկերավոր ասած, հաջորդ տարվա պետական բյուջեի կցորդն է լինելու:

Այսինքն, պետբյուջեի նախագծին զուգահեռ փոփոխություններ են առաջարկվում հարկային ոլորտի մի շարք օրենքներում, որոնք պետք է նպաստեն այդ բյուջեի կատարմանը: Այս տարվա նախագծերի փաթեթը, սակայն, էականորեն տարբերվում է նախորդներից: Երեկ ՀՀ ֆինանսների նախարար Վաչե Գաբրիելյանը հայտարարեց, որ դրանց կիրառումը պետական բյուջեի կատարման վրա կթողնի չեզոք ազդեցություն: Այլ կերպ ասած' փաթեթի ընդունման արդյունքում բյուջեի մուտքերը ոչ կավելանան, ոչ կպակասեն: Հենց այդքանով այս փաթեթը կարելի է առայժմ որակել կասկածելի նպատակներ ունեցող ինչ-որ բան: