Եգիպտոսի նախագահն իրեն փարավոն է հռչակում

Եգիպտոսը պատրաստվում է զանգվածային ցույցերի նոր ալիքի: Ուրբաթօրյա աղոթքից հետո Եգիպտոսի խոշոր քաղաքներում հարյուր հազարավոր մարդիկ են պատրաստվում դուրս գալ փողոց: Ցույցերի համար պատճառ է հանդիսացել նախագահ Մուհամմեդ Մուրսիի որոշումը՝ վերագրել իրեն նոր լիազորություններ: Այժմ նա կարող է ցանկացած ցուցում տալ, որն անհրաժեշտ է հեղափոխության պաշտպանության համար: Ընդ որում, նրա ստորագրած ցանկացած որոշում բողոքարկման ենթակա չէ: Ընդդիմությունն արդեն հայտարարել է՝ նման կերպով Մուհամմեդ Մուրսին իրեն նոր փարավոն է հայտարարել. փոխանցում է Vesti.ru-ն: 

«Նախագահ Մուրսիի բոլոր որոշումները՝ սկսած հունիսից՝ նրա կողմից Եգիպտոսի նախագահի պարտականությունների ստանձնումից, մինչև նոր սահմանադրության ընդունումը, վերանայման ենթական չեն ո՛չ դատարանի, ո՛չ էլ որևէ այլ իշխանական մարմնի կողմից»,-նշել է Եգիպտոսի նախագահի ներկայացուցիչ Յասիր Ամինը:

Նշենք, որ դատարանն այլևս չի կարող ազատ արձակել խորհրդարանի վերին պալատն ու Սահմանադրական ասամբլեան:

Նման անսահմանափակ իրավունքների դեմ բողոքել են ոչ միայն ընդդիմադիրները, այլև դատավորները: Առաջին անգամ պատմության մեջ Եգիպտոսի դատարանը պատրաստվում է իմպիչմենտ հայտարարել Եգիպտոսի նախագահին: Այդ որոշումը պաշտպանել են հարյուր հազարավոր մարդիկ, հատկապես նրանք, ովքեր 2011թ. հունվարին Թահրիր հրապարակում պայքարում էին նախկին առաջնորդ Հուսնի Մուբարաքի ռեժիմի տապալման դեմ:

«Նախագահի այդ որոշումն արդեն նշանակում է հեղափոխության տապալում»,-հայտարարել են ցուցարարները փողոցում:

Միաժամանակ Մուրսիի կողմնակիցները նույնպես փողոց են դուրս եկել՝ պաշտպանելով նախագահի որոշումը: Նրանք աջակցում են երկրում Մուբարաքի ժամանակ արգելված «Մուսուլման եղբայրներ» շարժման շարունակական իսլամականացմանը: