Սփյուռքի նախարարը համախմբման կոչ է անում (տեսանյութ)

Աշխարհի տարբեր երկրներում ապրող իմ հա՛յ բարեկամ, սիրելի՛ քույրեր և եղբայրներ, թանկագ՛ին ամերիկահայեր,

Այսօր բոլորս անլեկոծված ենք: Այսօր բոլորիս մտահոգության առարկան մեր սիրիահայերն են: Նորից դժբախտության մեջ է հայտնվել մեր ազգի մի հատվածը: Մեր քույրերն ու եղբայրները տառապում են: Նրանք մեծ կորուստներ են կրում և՛ ֆիզիկական, և՛ նյութապես, թալանվում է նրանց ունեցվածքը: Սիրիահայ փայլուն, զրնգուն, կազմակերպված համայնքը այսօր արնահոսում է, բաց վերք է դարձել:

Նրանց մի հատվածը հաստատվել է Հայաստանում: Եվ Հայոց պետությունը' Հանրապետության Նախագահի ղեկավարությամբ անում է ամեն ինչ, որպեսզի մեր հայրենակիցներն այստեղ իրենց զգան ինչպես իրենց տանը: Կրթության, առողջապահության, փաստաթղթերի, իրավական հարցերի, վիզաների հետ կապված բոլոր խնդիրները լուծելը նրանց համար դարձել է անվճար: Պետք է անենք նաև ամեն ինչ, որ նրանք հաստատվեն հայրենիքում:

Այսօր Հայաստանում և տարբեր երկրներում ապրող մեր սիրիահայ հայրենակիցները իրոք օգնության կարիք ունեն: Իրո՛ք, նրանց ցավը մենք պետք է ամոքենք: Իրո՛ք, մենք պետք է լինենք նրանց կողքին, նրանց հետ, որովհետև այսօր համախմբման պահ է:

Ես կոչ եմ անում, դիմում եմ աշխարհի բոլոր ծայրերում ապրող իմ հայրենակիցներին և ասում՝ եկեք այսօր մենք չնախաճաշենք և այդ գումարները փոխանցենք Հայաստան համահայկական հիմնադրամին: Փոխանցենք, որպեսզի այն դառնա օգնություն մեր սիրիահայ հայրենակիցներին: Այսօր օգնության կարիք ունի նաև հայ գյուղը, որովհետև հայրենիքը սկսում է հողից, գյուղից, հողը պահելուց, հողը պաշտպանելուց: Եվ փառք ու պատիվ մեր հայ գյուղացուն, որ թե՛ Արցախում, թե՛ Հայաստանում անում է ամեն ինչ՝ հայ գյուղը զարգացնելու համար: Այսօր մեր հպարտության, մեր ուրախության առարկան է դարձել Լեռնային Ղարաբաղի մայրաքաղաք Ստեփանակերտը: Երբ քայլում ես նրա փողոցներով քեզ թվում է, թե գտնվում ես Եվրոպական զարգացած երկրներից մեկում: Եվ ուզում եմ այս պահին խորին շնորհակալություն հայտնել բոլոր հայերին, այն հարյուր հազարավոր մեր հայրենակիցներին, ովքեր քսան տարի շարունակ հավատացել են «Հայաստան» հիմնադրամին, մասնակցել են համազգային այս ծրագրերին և իրենց օգնությունը բերել Ստեփանակերտի հզորացմանը, զարգացմանը, շենացմանը: Եվ այսօր էլ մենք միասնաբար պետք է փորձենք հայ գյուղը բարձրացնել, որովհետև հայ գյուղում ջրամատակարարման խնդիր կա, մենք ունենք դպրոցների և հիվանդանոցների վերանորոգման խնդիր: Մենք ծերերի և որբուկների օգնության խնդիր ունենք գյուղում: Ուրեմն, եկեք այս օրը դարձնենք նաև հայ գյուղի օգնության օր, սիրիահայերի օգնության օր: Եվ մեր միասնությամբ, մեր համախմբմամբ փորձենք հզորացնել և ծաղկացնել մեր գյուղը:

Հայաստանը, հայրենիքը դա մեր բնօրրանն է, մեր երկիրն է, մեր սրբությունն է: Եվ այդ սրբությունը պետք է բոլորս փայփայենք, բոլորս պահպանենք, որովհետև այստեղ է խտացված մեր անցյալը, մեր ներկան և իհարկե, ողջ հայության ապագան: Մեր նախնիները պայքարել են Հայաստանի անկախության համար, Հայաստանի պաշտպանության համար և այսօր պատմական պահ է, որ մենք' 10 մլն հայերս, հայրենիքը հզորացնելու համար համախմբվենք, որովհետև ամեն հայի պարտքն է, տուրքն է և պատվի գործն է՝ կայացած և զարգացած Հայաստան Հանրապետություն և Արցախ ունենալը: Եվ ես ուզում եմ խոսքս ավարտել մեծն Նժդեհի մարգարեությամբ. Հայրենիքները հզորանում են, գոյություն են ունենում հայրենասիրությամբ և ընկնում հայրենասիրության պակասից: Կարծում եմ մեր հայ ազգը, հայ ժողովուրդը հայրենասիրության պակաս չունի:

Ես հավատում եմ ձեզ:

ՀՀ սփյուռքի նախարար՝ Հրանուշ Հակոբյան