Հենց ծանոթության առաջին օրը նրան ասացի. «Արի՛ ամուսնանանք». Դավիթ Սեխպեյան (լուսանկարներ)

Հեռուստադիտողին «Դժվար ապրուստ» սերիալից ծանոթ Նոյի՝ Դավիթ Սեխպեյանի կյանքում օրերս կարևոր փոփոփություններ են տեղի ունեցել: Իր ֆեյսբուքյան կարգավիճակի փոփոխությունից դատելով՝ մենք կարծում էինք, թե դերասանն ընդամենը նշանադրվել է, սակայն Lurer.com- ի հետ զրույցում Դավիթն ավելի հետաքրքրի գաղտնիքներ բացահայտեց:

-Դավի՛թ, արդեն բավական ժամանակ է, ինչ հաստատվել են լուրերն այն մասին, որ ընտրյալ ունեք: Սակայն վերջերս Ձեր տված հարցազրույցներից մեկում, երբ խոսք էր եղել նշանադրության մասին, ասել էիք, որ նման ֆորմալ բաների ուշադրություն չեք դարձնում և շատ հնարավոր է՝ անգամ նշանդրություն չանեք: Սակայն օրեր առաջ Ձեր ֆեյսբույան էջում նկատվեց կարգավիճակի փոփոխություն, ըստ որի՝ դուք արդեն նշանվածներ եք։ Փաստորեն, այդուամենայնիվ, նշանադրություն որոշեցիք անե՞լ:

-Անկեղծ ասած՝ նշանադրություն՝ որպես այդպիսին չի էլ եղել, կամ շատ ավելի աննորմալ ձևով է եղել, քան բոլոր մահկանցուների մոտ է սովորաբար լինում: Չեմ ուզում մանրամասնել, քանի որ իսկապես շատ անձնական է: Ուղղակի կասեմ, որ մեծ իրադարձություն է եղել ու այն չգիտեմ, թե որքանով արժե կոչել նշանադրություն, ուղղակի մեծ քեֆ ենք արել: Չեմ էլ կարող կոնկրետ ասել, թե ոնց, ինչ կերպ և ինչու այսպես արեցինք: Մենք՝ ես և Նարինեն, ձևականությունների հետևից չենք ընկնում, կարևորն այն է, որ իրար կողքի ենք: Կարելի է ասել, որ մի քանի օր է, ինչ գրեթե ամուսնացած ենք:

-Այսինքն՝ հարսանեկան արարողություն այլևս չի՞ լինելու:

-Չգիտեմ, գուցե որոշ ժամանակ անց որոշենք անել հարսանեկան արարողություն:

-Ավելի քան մեկ տարի է, ինչ միասին եք: Ի՞նչ հանգամանքներում եք ծանոթացել:

-Դուռը բացվեց, և մտավ «նա…»:  Նարինեն իմ ընկերների ընկերներից էր, ու ծանոթացել ենք հենց մեր ընդհանուր ընկերական շրջապատում:

-Իսկ ի՞նչը միանգամից Ձեզ գրավեց նրա մեջ: Որպես տղամարդ՝ հակառակ սեռի մեջ առաջինը ի՞նչը կարող է Ձեր ուշադրությունը գրավել:

-Եթե մինչ Նարինեին հանդիպելս այս հարցը տայիք, երկար-բարակ կփիլիսոփայեի, իսկ հիմա չեմ էլ կարողանում առանձնացնել: Ուղղակի գիտեմ, որ երբ մարդուն սիրում ես, սիրում ես ամբողջովին՝ նրա դրական և բացասական կողմերով հանդերձ: Ավելին՝ ավելի շատ սիրում ես նրա բացասական կողմերը:

Մի բան հստակ է, երբ հանդիպում ես «նրան», 6-րդ զգայարանով ես զգում, որ հենց «նա» է... Ես հենց մեր ծանոթության առաջին օրը նրան ասացի. «Արի՛ ամուսնանանք»: Նարինեն, իհարկե, կարծեց, թե կատակում եմ, ձեռքիս մատանին դրեցի իր մատը... Այդ պահին միայն նա փոքր-ինչ լրջացավ:

Ու մեկ տարի է անցել, իսկ մենք արդեն կարելի է ասել՝ ամուսիններ ենք:

-Խաղալով թե՛ թատրոնում, թե՛ սերիալում և լինելով համակրելի երիտասարդ՝ կամա, թե ակամա հանրության ուշադրության կենտրոնում եք: Մարինեն չի՞ խանդում, և, առհասարակ, երկուսիցդ ո՞վ է ավելի խանդոտ:

-Պետք է խոստովանեմ, որ Նարինեն՝ որպես հմայիչ կին, ևս զերծ չէ հանրության ուշադրությունից: Ուստի այդ հավասարակշռությունը պահպանվում է: Սկզբնական շրջանում, իհարկե, ավելի արտացոլված էր խանդս, իսկ նա խանդելու հարցում ամեն ինչ ավելի գրագետ էր անում՝ ի տարբերություն ինձ: Հիմա այն ընդամենն առաջացնում է փոքրիկ ինտրիգ, ինչը երբեմն-երբեմն փոքր-ինչ  համեմում է մեր կյանքը: Երկուսս էլ հասուն մարդիկ ենք, ու խանդը չի կարող վեճերի առիթ դառնալ:

-Նարինեի՝ Ձեր կյանքում լինելը որևէ բան փոխե՞ց Ձեր մեջ:

-Ուղղակի, երբ կանք մեկս մյուսի կյանքում, ավելի ամուր ենք կանգնած հողի վրա, ավելի վստահ ենք շարժվում առաջ: Նրա՝ իմ կյանք մտնելուց հետո ավելի բարիացել եմ: Երջանիկ եմ, որ ունեմ նրան կողքիս:

Ի դեպ, նշենք, որ 24-ամյա Դավիթն ու իր սիրելին հասակակիցներ են: Նարինեն մասնագիտացած է հոգեբանության և բիզնեսի կառավարման մեջ և մասնագիտությամբ դերասանուհի չէ, սակայն  ԱՄՆ-ում ապրելու տարիներին խաղացել է մի քանի թատերական ներկայացումներում:

Զրուցեց Ռուբինա Հ.-ը
Լուսանկարները՝ Դավիթ Սեխպեյանի անձնական արխիվից