Hurriyet. Սիրիայի ընդդիմությունը ներկայացուցչություն կբացի Ստամբուլում

Թուրքիայի ԱԳ նախարար Ահմեդ Դավութօղլուն ուրբաթ հայտարարել է, որ Սիրիայի նոր կազմավորված հեղափոխական և ընդդիմադիր ուժերի ազգային կոալիցիան Ստամբուլում բացելու է ներկայացուցչության գրասենյակ՝ առանց մանրամասնելու՝ երբ է այն բացվելու, գրում է Hurriyet թերթը:

Ներկայացուցչության գլուխը դիտարկվելու է նաև որպես «Սիրիայի ժողովրդի ներկայացուցիչը», նշել է Դավութօղլուն՝ Մուազ Ալխաթիբի՝ Սիրիայի հեղափոխական և ընդդիմադիր ուժերի ազգային կոալիցիայի ղեկավարի հետ ունեցած բանակցություններից հետո:

Այն հարցին, թե սա քայլ է ճանաչելու խմբավորումը որպես սիրիական ժողովրդի միակ ներկայացուցիչ, ինչպես Ֆրանսիան է արել, Դավութօղլուն ասել է, որ մի քանի միացյալ քննարկումներ են տեղի ունենալու «Սիրիայի ընկերները» խմբի շրջանակներում, որոնք անց են կացվելու Մարոկկոյում, դեկտեմբերի 12-ին:

Դիվանագիտական աղբյուրները նշում են, որ նոր ընդդիմադիր խումբը ակնկալում է Մարոկկոյի հանդիպմանը հայտարարվել Սիրիայի ժողովրդի միակ ներկայացուցիչը:

Հավելենք, որ մի քանի օր առաջ Ֆրանսիայում համաձայնեցվել է հիմնել նոր սիրիական դեսպանություն՝ որպես Սիրիայի հեղափոխական և ընդդիմադիր ուժերի ազգային կոալիցիայի ներկայացուցչություն:

Հիշեցնենք, որ Ֆրանսիան առաջին ԵՄ պետությունն էր, որը ճանաչեց այս խմբավորումը՝ որպես Սիրիայի ժողովրդի միակ իրավական ներկայացուցիչ:

Նման հայտարարությամբ են հանդես եկել նաև Մեծ Բրիտանիան և Եվրոպական Միությունը: