Ստալինի նվիրած անվանական ժամացույցը Ջիվան Գասպարյանը փոխել է գարեջրի և կարկանդակների հետ

Հայ մեծանուն դուդուկահար Ջիվան Գասպարյանը համերգով հանդես է եկել Վորոնեժում:

«Воронежская газета»-ին տված իր հարցարզույցում Ջիվան Գասպարյանը բազմաթիվ հարցերի է անդրադարձել, պատմել իր ելույթների մասին, մասնավորապես՝ հիշատակել մի զավեշտալի դեպք իր կյանքից, թե ինչպես է Իոսիֆ Ստալինը նրան անվանական ժամացույց նվիրել, որը Գասպարյանը փոխանակել է 4 բաժակ գարեջրի և 4 կարկանդակի հետ:

Հիշելով այդ դեպքն իր կյանքից՝ հայ դուդուկահարը ժպիտով պատմում է. «Ես այն ժամանակ փոքր էի՝ 19 տարեկան: 1947 թվականն էր, և ես մասնակցում էի ինքնագործունեական ելույթների, որից հետո ինձ հրավիրեցին Մոսկվա: Մենք նվագեցինք Կրեմլում, և ես հանդես եկա մենակատարումով: Ահա ինձ ասացին, որ Ստալինը կանչում է ինձ իր սենյակ: Այնտեղ նա ինձ կարմիր տուփով նվեր հանձնեց, որի վրա Իոսիֆ Ստալինի ստորագրությունն էր: Իսկ մենք այն ժամանակ սոված պատանիներ էինք, չէ՞ որ պատերազմի հաջորդ տարիներն էին: Եվ ահա տղաներն ինձ ասացին, թե՝ Ջիվա՛ն, ինչի՞դ է պետք այդ ժամացույցը, արի՛ վաճառենք: Եվ ես փոխանակեցի այդ ժամացույցը գարեջրի և կարկանդակների հետ:

Այն ժամանակ ես չէի հասկանում, թե ինչ եմ անում, ես չգնահատեցի այդ իրի արժեքը: Իսկ արդեն հասուն տարիքում նույնիսկ վախենում էի բարձրաձայնել այս մասին. հայտնի չէ, թե ինչպես դրան կարձագանքեին ԽՍՀՄ-ում»,-մեջբերում է Գասպարյանի խոսքերը թերթը: