Գագիկ Ծառուկյանը կառաջադրի իր թեկնածությունը. քաղաքագետ

«Իմ կարծիքով՝ Գագիկ Ծառուկյանն առաջադրելու է իր թեկնածությունը: ԲՀԿ-ի հայտարարած այլընտրանքը դասական իմաստով ընդդիմություն է, բայց ոչ փողոցի։ Եթե, այնուամենայնիվ, ԲՀԿ-ն առաջադրվի, չի բացառվում նոր Մարտի 1, բայց կարծում եմ, որ եթե Վրաստանում իշխանափոխության անցում եղավ, Հայաստանում չի լինի»։ Այսպիսի տեսակետ այսօր լրագրողների հետ հանդիպման ընթացքում հայտնեց քաղաքագետ Լևոն Շիրինյանը։

Նրա խոսքով, երբ ԲՀԿ-ն սկսեց խոսել խորհրդարանական կառավարման մոդելի մասին, այն նպատակ ուներ միավորել քաղաքական դաշտը: Այս երևույթը մի փոքր ուշացած, բայց նորմալ քաղաքական գործընթաց է: Բացի այդ, իշխանության համար ձգձգվող գործընթացը ձեռնտու է, որովհետև նրանք այդ կերպ անում են ամեն ինչ, որպեսզի ընդդիմությունը չգա ընդհանուր հայտարարի: 

Լևոն Շիրինյանը նաև հավանական է համարում, որ առաջին և երկրորդ նախագահները ևս կառաջադրվեն: Իսկ ընդդիմության միասնական թեկնածուի հարցը, ըստ նրա, ժամանակի խնդիր է։

Քաղաքագետը, եթե լիներ նախագահ, ապա նախագահական ընտրություններից հետո կարձակեր Ազգային ժողովը, քանի որ ըստ նրա՝ Ազգային ժողովը չի իրականացնում իր հիմնական գործառույթը: «Եթե ընդդիմությունը հաղթի, հենց այդպես էլ կլինի»,-ասաց վերջինս և հավելեց, որ ինքը չի ցանկանա, որ կրկնվի այն, ինչ եղավ 2008-ին։