France 24. Լեռնային Ղարաբաղը՝ «վառոդի տակառ» Եվրոպայի դռների մոտ (տեսանյութ)

Օրերս ֆրանսիական հայտնի France 24 հեռուստաալիքը պատրաստել էր հաղորդում Լեռնային Ղարաբաղի վերաբերյալ՝ անդրադառնալով նաև Արցախի պատմությանը. հաղորդում է «Արմենպրես»-ը:

Այսպես, լրահաղորդման ժամանակ նշվում է. «Լեռնային Ղարաբաղը, որը Խորհրդային Միության ժամանակաշրջանում գլխավորապես բնակեցված է եղել հայերով, 1991-ից դարձել է իրական «վառոդի տակառ» Եվրոպայի դռների մոտ: ԼՂ խնդիրը մինչ այսօր իր լուծումը չի գտել, որի արդյունքում հայ-ադրբեջանական բախումները բազմապատկվել են: Ներկայացված լրահաղորդումը պատմում է փխրուն հրադադարի մասին. այն վավերագրական բացառիկ նյութ է»:

Հեռուստաընկերության լրագրողներն այցելել են հակամարտության սահմանային երկու կողմերը: Լրահաղորդման հեղինակները զրուցել են նաև Լեռնային Ղարաբաղի Հանրապետության Պաշտպանության բանակի հրամանատար Մովսես Հակոբյանի հետ:

«Մեր բանակը ստեղծված է պաշտպանական նպատակներով, սակայն ունակ է կատարելու նաև հարձակվողական գործողություններ»,-ասել է Պաշտպանության Բանակի հրամանատարը:

Ֆրանսիացի լրագրողները փաստում են, որ Լեռնային Ղարաբաղն իր մայրաքաղաք Ստեփանակերտով այսօր ապրում է կյանքի բնականոն հունով, ունի իր պետական իշխանության մարմինները, ուր կայացվում են երկրի համար կենսական նշանակություն ունեցող որոշումներ:

Հաղորդման հեղինակներն են Ուիլի Բրասիանոն, Արմեն Գևորգյանը և Մարկուս Մեյերը:

Տեսանյութը ֆրանսիական հանրությանը ներկայացվել է նոյեմբեր 22-ին: