Հայաստա՛ն, հայե՛ր, բաշկիրները, Բաշկիրիան Ձեզ հետ են. Բաշկիրիայի ԱԺ նախագահի տեղակալ

Նոյեմբերի 24-ին Երևանում գտնվող Բաշկիրիայի ԱԺ նախագահի տեղակալ Ռաֆայիլ Զինուրովը ՀՀ ԱԺ փոխնախագահ Էդուարդ Շարմազանովի ուղեկցությամբ այցելեց Ծիծեռնակաբերդի հուշահամալիր։

Բաշկիրիայի Աժ փոխնախագահը ծաղիկներ դրեց Հուշապատի մոտ գտնվող Արցախյան հերոսամարտի ազատամարտիկների շիրիմներին, 1915թ. Հայոց մեծ եղեռնի հուշակոթողին, լռությամբ ու խոնարհումով հարգեց անմեղ զոհերի հիշատակը։

«Արդեն չորրորդ անգամ եմ Հայաստանում և յուրաքանչյուր անգամ մեծ ցավ եմ ապրում լինելով Ծիծեռնակաբերդում: Այս հուշահամալիրը ոչ միայն հայ ժողովրդի համար է սրբավայր, այլև ողջ մարդկության։ 1915 թվականին տեղի ունեցածը մեծագույն կորուստ է Հայաստանի և ողջ հայության համար։ Ես գտնում եմ, որ Հայոց ցեղասպանությունը պետք է ճանաչվի ամբողջ աշխարհի կողմից»,-լրագրողներին ասաց Ռաֆայիլ Զինուրովը:

Բաշկիրիայի խորհրդարանի փոխնախագահը եղավ նաև Հայոց ցեղասպանության թանգարան-ինստիտուտում, ծանոթացավ Հայոց մեծ եղեռնը հավաստող վավերագրերին ու փաստաթղթերին, գրառում կատարեց Հուշամատյանում. «Բառեր չեմ գտնում։ Խորապես ցնցված եմ։ Երկնային արքայություն բոլոր նահատակվածներին։ Հայաստան, հայեր՝ բաշկիրները, Բաշկիրիան Ձեզ հետ են»։