Յասիր Արաֆատի աճյունի արտաշիրիմումը տեղի կունենա երեքշաբթի

Պաղեստինյան ինքնավարության ներկայացուցիչները հաստատել են, որ երեքշաբթի օրը տեղի է ունենալու պաղեստինյան առաջնորդ Յասիր Արաֆատի աճյունի արտաշիրիմման արարողությունը. փոխանցում է BBC-ն:

Արաֆատը վախճանվել էր 2004թ. Փարիզի հիվանդանոցներից մեկում կաթվածի հետևանքով: Մի քանի տարի անց ֆրանսիական դատախազությունը սկսել է հետաքննություն, որի նպատակն է պարզել, թե կարող էին արդյոք Արաֆատին թունավորել պոլոնիումով:
Ինչպես լրագրողներին հայտնել է պաղեստինյան հետախուզության նախկին պետ Թաուֆիք Թիրավին, Ռամալլայում գտնվող գերեզմանը բացելուց հետո նրա աճյունից մասնիկներ կվերցնեն փորձաքննության համար: Փորձաքննությունը վարելու են մասնագետներ Ռուսաստանից, Ֆրանսիայից և Շվեյցարիայից:

Դրանից հետո յուրաքանչյուր խումբ զբաղվելու է անկախ փորձաքննությամբ, իսկ աճյունը նույն օրը զինվորականների ուղեկցությամբ հողին է հանձնվելու:

Յասիր Արաֆատը գլխավորում էր «Պաղեստինի ազատագրության կազմակերպությունը» և 1996թ. դարձել է Պաղեստինյան ինքնավարության առաջին քարտուղարը:

Յասիր Արաֆատի մահը կասկածի մշուշով է պատված: 2004թ. նա մահացել էր Փարիզում, որից հետո նրա մահվան շուրջ ամենատարբեր վարկածներ էին շրջանառվում: Մի մասը կարծում է, թե նրան թունավորել են իսրայելցի լրտեսները, մյուսները պնդում են, թե նրա մոտ ՁԻԱՀ էր հայտնաբերվել:

2005թ. The New York Times-ը բժշկական վկայություն հրապարակեց, որում ասված էր, թե Արաֆատը մահացել է ուղեղի արնազեղումից:
Այնուամենայնիվ, այս օգոստոսին ֆրանսիական դատախազությունը հայտարարել էր նոր հետաքննության անցկացման մասին այն բանից հետո, երբ Ալ Արաբիա հեռուստաընկերությունը Լոզանի ինստիտուտի աշխատակիցների միջոցով Արաֆատի հագուստների և անձնական իրերի վրա պոլոնիումի զգալի հետքեր էր հայտնաբերել: