Գյումրու համայնքապետարանի մոտից 33 անձ է ձերբակալվել. ՔԿ

33 անձ ձերբակալվել է զանգվածային անկարգություններին մասնակցելու և արդարադատության իրականացմանը խոչընդոտելու հատկանիշներով նախաձեռնված քրեական վարույթի շրջանակում։ Այս մասին Euromedia24-ին հայտնեցին Քննչական կոմիտեից։

Ըստ հաղորդագրության՝ Գյումրիում Վարդան Ղուկասյանի ձերբակալությունից հետո, ի աջակցություն քաղաքապետի, մի խումբ անձինք դուրս են եկել փողոց և հավաքվել են համայնքապետարանի վարչական շենքի մոտ՝ այդ թվում նաև շենքի մուտքերի մոտ և ներսում։ Նրանք, տարբեր գործողություններ իրականացնելով, խոչընդոտել են քննչական գործողությունների իրականացմանը, իրականացրել են հասարակական անվտանգությանը սպառնացող զանգվածային անկարգություններ, որոնք ուղեկցվել են բռնությամբ, գույքի ոչնչացմամբ և վնասմամբ։

Երեկ քաղաքացիների և ոստիկանների միջև բախումներ տեղի ունեցավ, որի ժամանակ ոստիկանական ուժերը բիրտ ուժ են կիրառել քաղաքացիների հանդեպ։
Ձերբակալվածների թվում է նաև «Մեր ձևով» շարժման մասնակից, իրավաբան Ռուբեն Մխիթարյանը։

Գիշերը Գյումրիում անցել է լարված․ իրավապահները խուզարկություն են իրականացրել Վարդան Ղուկասյանի աշխատասենյակում։

Հիշեցնենք, որ նախօրեին ձերբակալվել էին Գյումրու համայնքապետ Վարդան Ղուկասյանը և քաղաքապետարանի մի շարք աշխատակիցներ։ Դրան հաջորդել էր գյումրեցիների բողոքի ակցիան Վարդանանց հրապարակում, որի ընթացքում տեղի են ունեցել բախումներ և զանգվածային ձերբակալություններ։

Քննչական կոմիտեն հայտնում է, որ նույն քրեական վարույթի շրջանակում ձերբակալվել է նաև ութ անձ՝ այդ թվում Գյումրու քաղաքապետ Վարդան Ղուկասյանը և քաղաքի գլխավոր ճարտարապետ Հենրիկ Գասպարյանը։