Ինչ գործով ազատազրկեցին Դավիթ Համբարձումյանին․ Փաստաբանը նոր մանրամասներ է հայտնում (տեսանյութ)

Փաստաբան Տիգրան Աթանեսյանը քիչ առաջ  ֆեյսբուքյան իր էջում տեսանյութ է հրապարակել, որում պարզաբանում է, թե ինչ քրեական գործի շրջանակներում է ազատազրկվել Դավիթ Համբարձումյանը։

Ըստ փաստաբանի գործը ձգվել է շուրջ 6 տարի․ «Քրեական գործը 2018 թվականին հարուցված գործն է՝ կապված այդ տարվա ապրիլին Հայանիստ և Հովտաշատ գյուղերի խաչմերուկում տեղի ունեցած իրադարձությունների հետ։ Այդ գործով Դավիթ Համբարձումյանին մեղադրանք էր առաջադրվել նախկին Քրեական օրենսգրքի 250-րդ հոդվածի 4-րդ մասով, այսինքն՝ «զինված խուլիգանություն»։ Նա կալանավորվել էր, ապա 2018 թվականի աշնանը կիրառվել էր գրավ։ Գործը 6 տարի՝  2019-ից սկսած, դատարաններում էր և այսօր ունեցավ իր այսպես ասած՝ ավարտը»։

Փաստաբանը շեշտեց՝ այս ամբողջ ընթացքում նշված գործով դատարանում քննված 4 վկաներից որևէ մեկը մեղադրական ցուցմունք չի տվել Համբարձումյանի դեմ, ավելին, նրանցից 3-ը հետագայում հրաժարվել են իրենց նախնական ցուցմունքից․ «Բայց դա չխանգարեց դատավորին՝ կայացնել մեղադրական վերդիկտ»։

Աթանեսյանը նշեց նաև՝ Դավիթ Համբարձումյանի նկատմամբ այս դեպքով կիրառելի էր համաներումը, սակայն դատավորը վերացրեց գրավը և որպես խափանման միջոց կիրառեց կալանքը։