ՓՊ–ն միջազգային կառույցներին կտեղեկացնի ՀՀ-ում փաստաբանների կալանավորման մասին

Այսօր հրավիրված ասուլիսին փաստաբանները բարձրաձայնեցին վերջին շրջանում իրենց նկատմամբ իրականացվող ոտնձգությունների մասին։

Փաստաբանների պալատի նախագահ Սիմոն Բաբայանը ներկայացրեց մի շարք դեպքեր, որոնք, ըստ նրա, վկայում են փաստաբանական գործունեության խոչընդոտման մասին։

Նրա խոսքերով՝ առաջին դեպքը վերաբերում է հոգևորականների պաշտպանության հետ կապված մի շարք հայտնի քրեական գործերի շրջանակներում փաստաբանների մասնագիտական գործունեության սահմանափակմանը։ «Պաշտպանները փորձել են իրականացնել իրենց մասնագիտական գործառույթները, սակայն վարույթն իրականացնող մարմինների գործողությունների հետևանքով նրանք զրկվել են իրենց վստահորդների հետ հանդիպելու, նրանց գտնվելու վայրի մասին տեղեկություն ստանալու հնարավորությունից։ Սա փաստաբանական գործունեության մեջ ուղղակի միջամտություն է և խոչընդոտում է փաստաբանի աշխատանքը»,- նշեց Սիմոն Բաբայանը։

Նա նաև անդրադարձավ փաստաբան Ալեքսանդր Կոչուբաևի նկատմամբ կիրառված անհամաչափ միջոցներին՝ նրա ֆեյսբուքյան գրառման հետ կապված։

«Իհարկե, կարելի է չողջունել այդ գրառումը, բայց խնդիրը դրա բովանդակությունը չէր, այլ այն, թե ինչ արձագանք ունեցավ իրավապահ համակարգը։ Ձերբակալման ընթացքում կիրառվել են անհամաչափ միջոցներ, իրականացվել է խուզարկություն փաստաբանական գրասենյակում, առգրավվել են անձնական իրեր և հեռախոս։ Սա անթույլատրելի է՝ ինչպես գործող իրավակարգավորումներով, այնպես էլ միջազգային պրակտիկայով, քանի որ փաստաբանի անձնական իրերը պարունակում են փաստաբանական գաղտնիք և առնչվում են վստահորդների շահերին։ Ավելին՝ այդ գործողությունները ստեղծում էին հաշվեհարդարի տպավորություն, ինչը բացարձակապես անընդունելի է»,- ընդգծեց նա։

Սիմոն Բաբայանը նաև անդրադարձավ Գյումրիում վերջին օրերին տեղի ունեցած հավաքի ժամանակ փաստաբան Ռուբեն Մխիթարյանին առնչվող գործին։ Նրա խոսքով՝ Մխիթարյանն իրավապաշտպան գործունեության շրջանակում բերման է ենթարկվել, այնուհետև կալանքի և խափանման միջոցի ընտրության ժամանակ հաշվի չի առնվել նրա մասնագիտական կարգավիճակը։ «Սա ևս փաստաբանական գործունեության մեջ ուղղակի միջամտություն է և խոչընդոտում է նրա մասնագիտական պարտականությունների իրականացմանը։ Փաստաբանների պալատը, ինչպես նաև Փաստաբանների իրավունքների պաշտպանության հանձնաժողովը, այս դեպքերը որակում են որպես անընդունելի և դատապարտելի»,- նշեց Փաստաբանների պալատի նախագահը և տեղեկացրեց, որ իրենք պատրաստվում են համապատասխան նամակներ հղել միջազգային կառույցներին։

«Լինելու ենք հետևողական, որպեսզի խախտված իրավունքները վերականգնվեն և նման դեպքերը շարունակություն չունենան»,- ասաց Սիմոն Բաբայանը։