Հովհաննավանքի պատարագի վերաբերյալ հաղորդում ներկայացվեց Գլխավոր դատախազություն

«ՀայաՔվե»-ն հանցագործության մասին հաղորդում ներկայացրեց Գլխավոր դատախազություն՝ Հովհաննավանքում վարչապետ Նիկոլ Փաշինյանի մասնակցությամբ կազմակերպված պատարագի վերաբերյալ։

«Հիմա սկսվում է ամենադժվարը՝ հետամուտ լինել, որ էդ ամեն ինչի հիման վրա գործ հարուցվի, մեր վճռականությունն այստեղ անբեկանելի է։ Բնականաբար, հետամուտ ենք լինելու։ Շատ կարևոր է, որ իրավապահ համակարգն իր ֆունկցիան կատարի, պաշտպանի բոլոր քաղաքացիների իրավունքը, չտրվի քաղաքական կոնյուկտուրային, քանի որ աստիճանբանար մեր քաղաքացիները կգան այն եզրակացության, որ մեր երկրում օրենքը չի գործում, դա կբերի քաոսի և անարխայի»,– լրագրողների հետ զրույցում ասաց «Հայաքվե» նախաձեռնության համահիմնադիր Ավետիք Չալաբյանը։

Նրա խոսքով՝ Մայր Աթոռ Սուրբ Էջմիածինը երեկ փաստացի արդեն հաղորդում է տվել հանցագործության մասին, որտեղ Մայր Աթոռը հանդիսանում է տուժող կողմ, որովհետև նրան պատկանող վանական համալիրը բռնությամբ բռնազավթվել է, օգտագործվել է ոչ նպատակային, խաթարվել է հավատացյալների կրոնական իրավունքները, և այս բոլորը միասին՝ առերևույթ համապատասխանում է ՀՀ Քրեական օրենսգրքի 209 և 441 հոդվածնրով նկարագրված հանցանքներին։

«Ուստի մենք այսօր ներկայացնում ենք հաղորդում հանցագործության մասին, որտեղ այդ ամեն ինչը մանրամասն նկարագրված է, բոլոր փաստերը՝ շարադրված»,- նշեց Չալաբյանը։