Բողոքարկելու ենք Արսեն Ղուկասյանի տնային կալանքը. պաշտպան

Այսօրվա դատական նիստում անհետ կորած զինծառայողի հարազատ Արսեն Ղուկասյանի խափանման միջոց կալանքը փոխարինվեց տնային կալանքով, բացակայելու արգելքով և 1 մլն դրամ գրավով։

Փաստաբան Տաթևիկ Սողոյանը դատական նիստից հետո լրագրողների հետ զրույցում նշեց, որ բողոքարկելու են Արսեն Ղուկասյանի տնային կալանքը։ Ըստ նրա՝ որևէ կալանքի հիմք առկա չէ։

Հիշեցնենք, որ սեպտեմբերի 29-ին ՊՆ շենքի մոտ տեղի ունեցած քաշքշուկի առթիվ ՊՆ և ՌՈ ծառայողների հաղորդման հիման վրա նախաձեռնված վարույթի շրջանակում ձերբակալվել էին անհետ կորած անձանց հարազատներ Արսեն Ղուկասյանը և Ապիջան Սարգսյանը։  

Միջնորդություն էր ներկայացվել դատարան՝ կալանքը որպես խափանման միջոց կիրառելու համար: Հոկտեմբերի 7-ին Արսեն Ղուկասյանը կալանավորվել էր 1 ամիս ժամկետով։ Ավելի վաղ փաստաբան Տաթևիկ Սողոյանը գրել էր, որ Արսեն Ղուկասյանը միայն սրտի մասով ունի 9 ծանր հիվանդություն, որոնք Կառավարության N 825-Ն որոշմամբ թվարկված են որպես կալանքի հետ անհամատեղելի հիվանդություններ։