Նուռնուսի կամրջի տակ հայտնաբերվել է մի տղամարդ. կատարվածն ինքնասպանությո՞ւն է, թե՞ դժբախտ պատահար (ՖՈՏՈ)

Այսօր՝ փետրվարի 2-ին, արտակարգ դեպք է տեղի ունեցել Կոտայքի մարզում։

Ինչպես դեպքի վայրից Լուրեր.com-ին հայտնում է ֆոտոլրագրող Գագիկ Շամշյանը, ժամը 12.30-ի սահմաններում ոստիկանության Նաիրիի բաժնից ահազանգ է ստացվել ՀՀ արտակարգ իրավիճակների նախարարության Հայաստանի փրկարար ծառայության հակաճգնաժամային կենտրոն և հայտնել, որ Կոտայքի մարզում գտնվող Նուռնուսի կամուրջի տակ տղամարդ է ընկած։ Նրան ձորից դուրս բերելու համար անհրաժեշտ է փրկարարների օգնությունը։

Այս պահին ժամանել են Հայաստանի փրկարար ծառայության Կոտայքի մարզի փրկարարները, ովքեր ձորից դուրս բերեցին վիրավոր մի տղամարդու, ում շտապօգնության ավտոմեքենան մարմնական վնասվածքներով տեղափոխեց Աբովյան բժշկական կենտրոն։ Ժամանել են նաև ոստիկանության Նաիրիի բաժնի օպերատիվ խումբը, ինչպես նաև դատաբժիշկը, փորձագետը։ Այս պահին ժամանել է նաև ոստիկանության քննչական գլխավոր վարչության Կոտայքի բաժնի քննչական բաժնի քննիչը։

Գ. Շամշյանը հայտնել է, որ ձորից դուրս բերված անձը, ըստ դեպքի վայրում հավաքվածների, Կոտայքի մարզի բնակիչ Վահան Ղազարյանն է։ Փաստի առթիվ ոստիկանության Կոտայքի քննչական բաժնի Նաիրիի քննչական բաժանմունքում նյութեր են նախապատրաստվում։

Հավաքվածները ֆոտոլրագրողին պատմել են, որ տղամարդն ինքնասպանության նպատակով իրեն ցած է նետել Նուռնուսի կամրջից, և բարեբախտաբար ողջ է մնացել, սակայն այս պահին գտնվում է վերակենդանացման բաժանմունքում։ Կատարվածն ինքնասպանությո՞ւն է, թե՞ ոչ, պետք է պարզի քննչական մարմինը։

Քիչ առաջ ֆոտոլրագրող Գագիկ Շամշյանը հայտնեց, որ Աբովյանի բժշկական կենտրոնից Սուրբ Գրիգոր Լուսավորիչ բժշկական կենտրոն տեղափոխելու ճանապարհին Վ. Ղազարյանը մահացավ։

Լուսանկարները՝ Գագիկ Շամշյանի։