Հրազդանում ավտոմեքենան գետն է ընկել. կա 4 վիրավոր (ԼՐԱՑՎԱԾ` ՖՈՏՈ, ՏԵՍԱՆՅՈՒԹ)

Ոստիկանության Հրազդանի բաժնում նյութեր են նախապատրաստվում երեկ` հոկտեմբերի 25-ին, տեղի ունեցած ավտովթարի փաստով: 

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, երեկ` հոկտեմբերի 25-ին, 10.40-ի սահմաններում, Հրազդան քաղաքի Ջրառատ թաղամասի բնակիչ, Պաշտպանության նախարարության ռազմական ոստիկանության X զորամասում որպես պայմանագրային զինծառայող ծառայող, շարքային, 22-ամյա Արսեն Հարությունյանը, վարելով «ՈւԱԶ» մակնիշի 07 ՍՏ 167 համարանիշի ավտոմեքենան, Հրազդան-Հանքավան ավտոճանապարհի 5-րդ կմ-ի հատվածում դուրս է եկել ճանապարհի երթևեկելի գոտուց և հայտնվել գետի մեջ:

Վթարի արդյունքում Արսեն Հարությունյանը և ուղևորներ` Հրազդան քաղաքի Ջրառատ թաղամասի բնակիչներ` 28-ամյա Էդգար Մարկոսյանը, 49-ամյա Դավիթ Սողոմոնյանը և 26-ամյա Գագիկ Գևորգյանը մարմնական վնասվածքներով տեղափոխվել են Հրազդանի բժշկական կենտրոն:

Դեպքի վայր են մեկնել ոստիկանության Հրազդանի բաժնի օպերատիվ խումբը` Հրազդանի բաժնի պետի օպերգծով տեղակալ Վաչագան Ներսիսյանի գլխավորությամբ:

Դեպքի վայրում են եղել նաև Ճանապարհային ոստիկանության 2-րդ սպայական գումարտակի 2-րդ վաշտի 3-րդ դասակի տեսուչները` դասակի հրամանատար Խաչատրյանի գլխավորությամբ:

Ֆոտոլրագրող Գագիկ Շամշյանը հայտնեց նաև, որ ոստիկանության քննչական գլխավոր վարչության Կոտայքի մարզի քննչական բաժնում նախապատրաստված նյութերն այսօր ուղարկվել են Պաշտպանության նախարարության քննչական վարչություն:

Լուսանկարները` Գագիկ Շամշյանի