Հրդեհ «Շիրակ» հյուրանոցում. ամբողջովին այրվել է կառավարչի սենյակը

Երեկ՝ փետրվարի 2-ին, ժամը 23.30-ին, Արտակարգ իրավիճակների նախարարության հակաճգնաժամային կառավարման կենտրոն ահազանգ է ստացվել, որ Խորենացի փողոցի թիվ 13ա հասցեում գտնվող «Շիրակ» հյուրանոցում ուժեղ ծուխ է առաջացել, կան կասկածներ, որ հնարավոր է նաև տեղի ունենա հրդեհ։

Ինչպես դեպքի վայրից Լուրեր.com-ին հայտնում է ֆոտոլրագրող Գագիկ Շամշյանը, այս պահին «Շիրակ» հյուրանոց են ժամանել ՀՀ ԱԻՆ Հայաստանի փրկարար ծառայության Երևանի փրկարարական վարչության մեծ թվով աշխատակիցներ՝ վարչության պետ Մուշեղ Ղազարյանի գլխավորությամբ։ Հրշեջները դեպքի վայր են ժամանել 3 մարտական հաշվարկ և մեկ ավտոսանդուղք տեխնիկայով։

Ֆոտոլրագրողը հայտնում է, որ մոտ 1 ժամից ավել հրշեջները հետախուզական աշխատանքներ էին կատարում հյուրանոցի ներսում պարզելու համար կրակի օջախի վայրը։ Վերջապես նրանց հաջողվեց հայտնաբերել այն, որ ծուխն առաջացել է 3-րդ հարկում գտնվող հյուրանոցի կառավարչի սենյակից առաջացած կրակից։ Արդեն այն ամբողջովին մարվել և մեկուսացվել է։

Ըստ դեպքի վայրում հավաքված հրշեջների՝ այրվել է մոտ 30 քմ տարածք։ Նշված հատվածում երթևեկությունը ժամանակավորապես դադարեցվել է Երևանի ՃՈ աշխատակիցների կողմից։ Փաստի առթիվ ոստիկանության Կենտրոնականի բաժնում նյութեր են նախապատրաստվում։ Արդեն նշանակվել են մի շարք փորձաքննություններ։ Բարեբախտաբար, զոհեր և վիրավորներ չկան։