Վարդաշենում հարկադիր կատարողները վտարում են 45 տարի տվյալ տանն ապրողներին (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Այս պահին Վարդաշեն 6-րդ փողոցի 45 տուն են եկել շտապօգնության երկու բրիգադ: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված տուն են եկել հարկադիր կատարողներն ու ոստիկանության Էրեբունու բաժնի աշխատակիցները և այս պահին վտարում են այդտեղ բնակվող ընտանիքի անդամներին, որոնց թիվը 8-9 հոգի է:

Հարևանները ֆոտոլրագրողին պատմել են, որ ընտանիքը նշված տանն արդեն ապրում է մոտ 45 տարի, և հիմա ինչ-որ կին` Օլգա Հովհաննիսյան անունով, ով ավելի հայտնի է դատական համակարգում իր զեղծարարություններով, այժմ էլ օգտագործելով ինչ-որ պաշտոնյայի հետ իր կապերը, հասել է նրան, որ ըստ տան բնակիչների և հարևանների` դատական ապօրինի որոշումներից հետո փորձում է վտարել ընտանիքին իր տնից:

Ֆոտոլրագրող Գագիկ Շամշյանը նշում է, որ կինն արդեն հասել է իր ծրագրածին. այս պահին հարկադիր կատարողներն արդեն բեռնատարով տեղափոխում են ընտանիքի գույքը, իսկ թե ուր են տեղափոխում, հայտնի չէ. ըստ երևույթին, ԴԱՀԿ պահեստներ:

Ընտանիքի անդամներից մի քանիսը վատացել են, ում համար էլ ժամանել են շտապօգնության մեքենաները:

Շտապօգնության բուժքույրը ֆոտոլրագրողին հայտնել է, որ ընտանիքի անդամներից մեկը` տատիկը, պետք է տեղափոխվի հիվանդանոց:

Ֆոտոլրագրող Գագիկ Շամշյանը փոխանցում է նաև, որ հարևաններն էլ իրենց արդարացի բողոքն են հայտնում, որ մարդիկ մոտ 45 տարի ապրել են իրենց տանը ու հիմա ինչ-որ Օլգա Հովհաննիսյան վտարել է տալիս ընտանիքին իրենց տնից:

Քիչ առաջ ֆոտոլրագրողը հայտնեց, որ նշված հասցե են եկել Մարդու իրավունքների պաշտպանի աշխատակազմի ներկայացուցիչները, ովքեր փորձում են տեղում ծանոթանալ ստեղծված իրավիճակին և որոշման օրինականությանը:

Լուսանկարները և տեսանյութը՝ Գագիկ Շամշյանի