Պտղնի գյուղում ցրտաշունչ ձմռանը կրքերը թեժանում են (ՖՈՏՈ)

Այսօր՝ փետրվարի 6–ին, Կոտայքի մարզի Պտղնի գյուղի Վերին թաղամասում հավաքվել են մեծ թվով գյուղացիներ, որոնք իրենց դժգոհությունն էին արտահայտում, որ 50–ից ավելի տներ ունեն խմելու ջրի խնդիր։ Ինչպես Պտղնիից հայտնում է Գագիկ Շամշյանը գյուղացիները իրենց խոսքում պատմում են, որ անցյալ տարվա դեկտեմբերի վերջերից իրենց թաղամասին հիսունից ավելի տներում խմելու ջուր չի գալիս, քանի որ ջրի խողովակներն ամբողջովին ոչ միայն սառել, այլ նաև տեղ–տեղ հսկայական ճաքեր են տվել։ Ըստ գյուղացիների՝ նրանք մի քանի անգամ դիմել են համապատասխան կառույցներին, մասնավորապես՝ Կոտայքի մարզպետարան, համայնքի ղեկավարին և «Երևան Ջուր» ընկերությանը։

«Երևան Ջուր»-ն ու համայնքի ղեկավարությունը պատասխանել են, որ դա իրենց գործը չէ, և գյուղացիների պատմելով՝ մինչ այժմ սայլը տեղից չի շարժվում, ինչի պատճառով մոտ 50 տուն, որտեղ մոտավորապես բնակվում է 300 մարդ, չեն կարողանում լուծել իրենց կենցաղային և սանիտարական հարցերը։ Հավաքված կանայք բողոքում էին, որ դույլերով հազիվ կարողանում են տարբեր տեղերից ջուր հայթայթել, այն էլ՝ քայլելով 1-2 կիլոմետր սարցակալած փողոցներով։ Պտղնի համայնքի ղեկավար Առաքել Վիրաբյանը ֆոտոլրագրողի հետ զրույցում պատմել է, որ իրենք տեղյակ են այդ փաստից և որ ջրախողովակի վերանորոգման աշխատանքները պետք է կատարի «Երևան Ջուր»-ը, քանի որ գյուղացիների մուծած վարձերը հատկացվում են իրենց և սպասարկման պատասխանատուն «Երևան  Ջուր»-ն է։ Գյուղապետը հայտնեց նաև, որ անցյալ տարի նա դիմել է Կոտայքի մարզպետ Կովալենկո Շահգալդյանին, որն էլ իր հերթին՝ ՀՀ կառավարությանը, որից հետո հատկացվել է 30 միլիոն ՀՀ դրամ և անցկացվել նոր ջրագիծ։ Այդ նոր ջրագիծը գալիս է Արզաքան–Երևան ջրագծից, սակայն գյուղացիները, գյուղապետի ասելով, ցանկանում են նախկին ջրագծից ջուր ունենալ, որը գալիս էր Գառնիից։ Տեղակայվել են նաև պոմպակայաններ, իսկ նոր ջրագծից նշված գյուղացիների տներին ջրի խողովակներ միացնելու համար մեծ չափի գումարներ են անհրաժեշտ, որը գյուղապետարանը չունի։ Գյուղացիները պատմում են, որ կանոնավոր կատարել են մուծումները, իսկ հիմա, երբ ջրի խնդիր ունեն, «Երևան Ջրի» տեսուչները հատուկ անջատում են ջուրը և գյուղացիներին սպառնում, որ ջուր օգտագործած–չօգտագործած՝ պետք է փող տաք։ Պտղնին ունի 550 տուն և մոտ 1700 բնակիչ։ Գյուղացիները նշում են, որ իրենց հարևանությամբ է ապրում նաև մեծահարուստ և բարերար Գագիկ Ծառուկյանը, սակայն իր տան բարձունքից չի հետաքրքրվում շարքային գյուղացու հոգսերով ու խնդիրներով։

Լուսանկարները՝ Գագիկ Շամշյանի։

{gallery}shamshyan/ptgni{/gallery}