ՇՏԱՊ. Սպանություն Երևանում. դիակը փորձել են այրել (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր` հոկտեմբերի 28-ին, արտակարգ պատահար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, գիշերը ժամը 01.40-ի սահմաններում «Հաղթանակ» կամրջի տակ` Թաիրով փողոցի աջակողմյան հատվածի ոչ երթևեկելի մասում, հայտնաբերվել է կարմիր գույնի «ՎԱԶ 2105» մակնիշի առանց համարանիշների ավտոմեքենա, որը վառվում էր:

Շտապ դեպքի վայր են մեկնել ՀՀ Արտակարգ իրավիճակների նախարարության Հայաստանի փրկարար ծառայության Երևանի փրկարարական վարչության հրշեջ-փրկարարները:

Այնտեղ է եղել Արտակարգ իրավիճակների նախարարության Հայաստանի փրկարար ծառայության օպերատիվ վարչության պետ Արման Ցոլակյանը:

Միևնույն ժամանակ դեպքի վայր են ժամանել ոստիկանության Երևան քաղաքի վարչության աշխատակիցները` ոստիկանության Երևան քաղաքի վարչության քրեական հետախուզության բաժնի պետ Արտակ Կարապետյանի գլխավորությամբ:

Դեպքի վայրում էին Մալաթիա-Սեբաստիա վարչական շրջանի օպերատիվ խումբը` ոստիկանության Մալաթիա-Սեբաստիայի բաժնի պետ, ոստիկանության գնդապետ Լևոն Յազիչյանի գլխավորությամբ:

Ավտոմեքենայի հրդեհը մարելուց հետո ոստիկանության և փրկարար ծառայության աշխատակիցները նշված ավտոմեքենայի կիսաայրված հետևի նստատեղին հայտնաբերել են պոլիէթիլենային տոպրակներով, սրբիչներով, կտորե ծածկոցով և կպչուն ժապավենով փաթաթված վիճակում մի տղամարդու դիակ` գլխի մասում բազմաթիվ վերքերի հետքերով:

Արդեն պարզվել է դիակի ինքնությունը. նա Երևանի Խնկո-Ապոր փողոցի բնակիչ, 61-ամյա Վրեժ Գրիգորյանն էր:

Ձեռնարկված օպերատիվ-քննչական գործողությունների արդյունքում պարզվել է ավտոմեքենայի համարանիշը` 61 ՍԼ 780. նշված ավտոմեքենան հաշվառված է Վրեժ Գրիգորյանի անվամբ:

Փաստի առթիվ ոստիկանության Մալաթիա-Սեբաստիայի բաժնի քննչական բաժնում հարուցվել է քրեական գործ` ՀՀ քրօր.-ի 1o4 հոդվածի (սպանություն) հատկանիշներով:

Լուսանկարները՝ Գագիկ Շամշյանի