«Չայնիի ոլորաններում» ձյան տակից ոստիկաններն ու փրկարարները դուրս են բերել 30–ից ավելի ավտոմեքենաներ (ՖՈՏՈ, ՏԵՍԱՆՅՈՒԹ)

Այսօր՝ փետրվարի 10-ին, արտակարգ իրավիճակ է ստեղծվել Երևան–Սևան ավտոճանապարհի 25-րդ կմ–ում՝ «Չայնիի ոլորաններում»։ Ինչպես դեպքի վայրից Լուրեր.com–ին հայտնում է ֆոտոլրագրող Գագիկ Շամշյանը, ժամը 18.00-ից ճանապարհային ոստիկանության 2-րդ սպայական գումարտակի 3-րդ վաշտի մեծ թվով աշխատակիցներ, ՀՀ արտակարգ իրավիճակների նախարարության Հայաստանի փրկարար ծառայության Կոտայքի մարզի փրկարարներով, ինչպես նաև մի քանի անհատ քաղաքացիներ՝ «Համեր» մակնիշի ավտոմեքենաներով, Կոտայքի մարզի «Ճանշին»–ի աշխատակիցների հետ փորձում են նշված հատվածից դուրս բերել ձյան տակ մնացած մեծ թվով ավտոմեքենաներ, դրանց վարորդներին և ուղևորներին։ Ավտոմեքենաների խցանման երկարությունը մոտավորապես 4-ից 5 կմ է, որը փակվել է ձնաբքի պատճառով։

Ճանապարհային ոստիկանության աշխատակիցներն ու փրկարարները նրանց հասնելու համար անգամ ոտքով են մոտենում, քանի որ ավտոմեքենաները ի վիճակի չեն անցնելու նշված հատվածով։ Այս պահին այստեղ են գտնվում ճանապարհային ոստիկանության 2-րդ սպայական գումարտակի հրամանատար Արսեն Արշակյանն ու 2-րդ սպայական գումարտակի 3-րդ վաշտի հրամանատար Արսեն Գրիգորյանը և 3-րդ վաշտի ողջ անձնակազմն արդեն հիմնականում մարդկանց տեղափոխել է։ Խցանման վայրից դուրս է բերվել 35 տրանսպորտային միջոց։ Այս պահին մի քանի տրանսպորտային միջոցներ դեռևս մնացել են ձյան տակ։

Բարեբախտաբար, զոհեր և վիրավորներ չկան։

Նշված ճանապարհահատվածը ճանապարհային ոստիկանության աշխատակիցների կողմից 3 ժամ է փակված է, որպեսզի ձյան տակի մարդկանց և ավտոմեքենաները կարողանան օպերատիվորեն դուրս բերեն, ինչպես նաև որպեսզի ճանապարհը հնարավոր լինի մաքրել կուտակված ձյունից։

Լուսանկարները և տեսանյութը՝ Գագիկ Շամշյանի։

{gallery}shamshyan/30avto{/gallery}