Սպանությունը բացահայտվել է. հայր ու որդի սպանել են ամուսիններին և փորձել կնոջ սպանությունը բարդել ամուսնու վրա (ֆոտո, տեսանյութ)

Այսօր՝ հոկտեմբերի 28-ին, ոստիկանության քննչական գլխավոր վարչության հատկապես կարևոր գործերով վարչության քննիչների և ոստիկանության քրեական հետախուզության գլխավոր վարչության աշխատակիցները Գեղարքունիքի մարզում քննչական-փորձարարական աշխատանքներ էին կատարում:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այս տարվա սեպտեմբերի 1-ին անհայտ քաղաքացին ահազանգել էր ոստիկանության Կոտայքի բաժին, որ Ողջաբերդ գյուղի սկզբնամասում՝ Չարենցի կամարից 500 մետր հեռավորության վրա, դիակ կա:

Նշված հատվածում իրավապահները հայտնաբերել էին կնոջ դիակ՝ չթալանված վիճակում: Նույն օրը ոստիկանության Կոտայքի բաժնում հարուցվել էր քրեական գործ' ՀՀ քրօր.-ի 104 հոդվածի (սպանություն) հատկանիշներով:

Ոստիկանության ձեռնարկած օպերատիվ-քննչական գործողությունների արդյունքում պարզվել էր, որ սպանվածը Երևան քաղաքի բնակիչ, ոստիկանության Նոր Նորքի բաժնի կողմից որպես անհայտ կորած հետախուզվող, «Մենք մերոնցով» թերթի խմբագիր, 51-ամյա Ալվարդ Աբրահամյանն էր:

Ոստիկանության քննչական գլխավոր վարչության ՀԿԳ քննության վարչության կողմից ստեղծվել էր քննչական խումբ` ՀԿԳ քննության վարչության պետ Արսեն Այվազյանի գլխավորությամբ:

Այսօր ոստիկանության օպերատիվ-քննչական խումբը ոստիկանության քննչական գլխավոր վարչության ՀԿԳ քննության վարչության և ոստիկանության Կոտայքի բաժնի հետ համատեղ օպերատիվ-քննչական գործողությունների արդյունքում պարզում է, որ Ալվարդ Աբրահամյանը աշխատանքային ու ֆինանսական հարաբերությունների մեջ է եղել Երևանի բնակիչ, 58-ամյա Վաղարշակ Աբաջյանի հետ: Նրանց միջև տարաձայնություններ են ծագել, ինչին խառնվել է Ալվարդ Աբրահամյանի ամուսինը` Յուրի Սրապյանը:

Նշված խնդիրները պարզաբանելու նպատակով Վաղարշակ Աբաջյանն ու իր որդին` Հակոբը, Յուրի Սրապյանի հետ մեկնել են Գեղարքունիքի մարզի Այրիվանք գյուղ, որտեղ գտնվող մի կիսակառույց տարածքում փորձել են լուծել առաջացած խնդիրները: Այս տարածքում էլ հայր և որդի Սրապյանները դաժանաբար ծեծել են Յուրի Սրապյանին, որից հետո խեղդամահ են արել նրան և նրա վրայից հանելով հագուստն ու կոշիկները՝ դիակը գցել են մի փոսի մեջ և քարերով ծածկել են այն, ապա հեռացել են հանցագործության վայրից:

Ոստիկանությունը քննչական գործողությունների արդյունքում պարզել է, որ Երևան վերադառնալիս հայր և որդի Աբաջյանները ճանապարհի տարբեր հատվածներում դեն են նետել Սրապյանի հագուստը և կոշիկները: Նրանք այդ քայլով, ըստ քննչական մարմնի, փորձել են ալիբի ստեղծել և թաքցնել սպանության հետքերը:

Արդեն Երևանում Աբաջյանները Ալվարդ Աբրահամյանին` սպանվածի կնոջը, խաբեությամբ տարել են Կոտայքի մարզի Ողջաբերդ գյուղի մոտ գտնվող Չարենցի կամարի մոտ, որտեղ Վաղարշակ Աբաջյանը խեղդամահ է արել կնոջը:

Այնուհետև, ինչպես պարզել է քննչական մարմինը, Աբաջյանները հույս են ունեցել Ալվարդ Աբրահամյանի սպանությունը բարդել ամուսնու` Յուրի Սրապյանի վրա, թե իբր վերջինս սպանել է իր կնոջն ու անհետացել` ենթադրաբար հեռացել հանրապետությունից:

Քննչական մարմնին հանցագործությունը բացահայտելու ճիշտ ուղուց շեղելու այս փորձը ձախողվել է, և հոկտեմբերի 26-ին հայր և որդի Աբաջյանները սպանություն կատարելու կասկածանքով բերման են ենթարկվել ոստիկանության Կոտայքի բաժնի կողմից:

Այս պահին նրանք ձերբակալված են:

Ֆոտոլրագրող Գագիկ Շամշյանը հայտնում է, որ հավանաբար մեկ կամ երկու օրից քննչական մարմինը կդիմի դատարան, որպեսզի Վաղարշակ և Հակոբ Աբաջյանների նկատմամբ որպես խափանման միջոց ընտրվի կալանքը:

Լուսանկարները և տեսանյութը` Գագիկ Շամշյանի