Որդին կացնով սպանել է հորը, ապա դին դրել է ավտոմեքենայի մեջ ու ավտոմեքենան հրդեհել (ֆոտո, տեսանյութ)

Քիչ առաջ ոստիկանության Մալաթիա-Սեբաստիայի բաժին է բերման ենթարկվել մի երիտասարդ: Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված երիտասարդը կասկածվում է այսօր տեղի ունեցած սպանությունը կատարելու մեջ:

Երիտասարդը 23-ամյա Սիփան Վրեժի Գրիգորյանն է:

Ֆոտոլրագրող Գագիկ Շամշյանը հայտնեց, որ երիտասարդը սպանվածի որդին է, ով կացնով սպանել է հորը, ապա հոր դիակը փաթաթել սրբիչներով, կտորե ծածկոցով ու կպչուն ժապավեններով, դրել հոր ավտոմեքենայի մեջ և տեղափոխել մինչև Հաղթանակ կամրջի տակ' Թաիրով փողոցի աջակողմյան հատված, ու այնտեղ հրկիզել ավտոմեքենան:

Ոստիկանության ձեռնարկած օպերատիվ-քննչական գործողությունների արդյունքում, որոնք իրականացնում էր Մալաթիա-Սեբաստիա վարչական շրջանի օպերատիվ խումբը՝ ոստիկանության Մալաթիա-Սեբաստիայի բաժնի պետ, ոստիկանության գնդապետ Լևոն Յազիչյանի գլխավորությամբ, Սիփան Գրիգորյանը խոստովանել է հանցագործությունը և ոստիկանության Մալաթիա-Սեբաստիա բաժին ներկայացրել հանցագործության գործիքը՝ կացինը:

Երիտասարդը խոստովանել է, որ կացնով մի քանի անգամ հարվածել է հոր գլխին՝ այդպես սպանելով նրան:

Հիշեցնենք, որ այսօր՝ հոկտեմբերի 28-ի գիշերը, արտակարգ պատահար էր տեղի ունեցել Երևանում:

Ինչպես դեպքի վայրի ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, գիշերը ժամը 01.40-ի սահմաններում «Հաղթանակ» կամրջի տակ' Թաիրով փողոցի աջակողմյան հատվածի ոչ երթևեկելի մասում, հայտնաբերվել է կարմիր գույնի «ՎԱԶ 2105» մակնիշի առանց համարանիշների ավտոմեքենա, որը վառվում էր:

Շտապ դեպքի վայր էին մեկնել ՀՀ Արտակարգ իրավիճակների նախարարության Հայաստանի փրկարար ծառայության Երևանի փրկարարական վարչության հրշեջ-փրկարարները:

Այնտեղ էր եղել Արտակարգ իրավիճակների նախարարության Հայաստանի փրկարար ծառայության օպերատիվ վարչության պետ Արման Ցոլակյանը:

Միևնույն ժամանակ դեպքի վայր էին ժամանել ոստիկանության Երևան քաղաքի վարչության աշխատակիցները' ոստիկանության Երևան քաղաքի վարչության քրեական հետախուզության բաժնի պետ Արտակ Կարապետյանի գլխավորությամբ:

Դեպքի վայրում էին եղել Մալաթիա-Սեբաստիա վարչական շրջանի օպերատիվ խումբը' ոստիկանության Մալաթիա-Սեբաստիայի բաժնի պետ, ոստիկանության գնդապետ Լևոն Յազիչյանի գլխավորությամբ:

Ավտոմեքենայի հրդեհը մարելուց հետո ոստիկանության և փրկարար ծառայության աշխատակիցները նշված ավտոմեքենայի կիսաայրված հետևի նստատեղին հայտնաբերել են պոլիէթիլենային տոպրակներով, սրբիչներով, կտորե ծածկոցով և կպչուն ժապավենով փաթաթված վիճակում մի տղամարդու դիակ' գլխի մասում բազմաթիվ վերքերի հետքերով:

Պարզվել է դիակի ինքնությունը. նա Երևանի Խնկո-Ապոր փողոցի բնակիչ, 61-ամյա Վրեժ Գրիգորյանն է եղել, որը աշխատել է' որպես Բագրատունյաց փողոցի վրա գտնվող ԴՈՍԱՖ-ի տնօրեն:

Ձեռնարկված օպերատիվ-քննչական գործողությունների արդյունքում պարզվել է ավտոմեքենայի համարանիշը' 61 ՍԼ 780. նշված ավտոմեքենան հաշվառված է Վրեժ Գրիգորյանի անվամբ:

Փաստի առթիվ ոստիկանության Մալաթիա-Սեբաստիայի բաժնի քննչական բաժնում հարուցվել է քրեական գործ' ՀՀ քրօր.-ի 1o4 հոդվածի (սպանություն) հատկանիշներով:

Լուսանկարները և տեսանյութը` Գագիկ Շամշյանի