Վրաերթ մահվան ելքով. վարորդը դիմել է փախուստի (ՖՈՏՈ, ՏԵՍԱՆՅՈՒԹ)

Այսօր՝ փետրվարի 15-ին, վրաերթ է տեղի ունեցել Երևանում։

Ինչպես դեպքի վայրից Լուրեր.com-ին հայտնեց ֆոտոլրագրող Գագիկ Շամշյանը, 15։00-ի սահմաններում Երևանի Էրեբունի պողոտայի և Աթոյան փողոցի խաչմերուկում անհայտ մակնիշի և համարանիշի ավտոմեքենայի վարորդը վրաերթի է ենթարկել հետիոտնին ու թողնելով անօգնական վիճակում՝ դիմել փախուստի։

Հետիոտնը միջին տարիքի կին է, ով տեղում մահացել է։ Այս պահին դեպքի վայր են ժամանել Երևանի ՃՈ 1-ին սպայական գումարտակի աշխատակիցները և ոստիկանության Էրեբունու բաժնի օպերատիվ խումբը՝ բաժնի պետի օպերգծով տեղակալ Արսեն Ավոյանի և Էրեբունու բաժնի քրեական հետախուզության բաժանմունքի պետ Գևորգ Հակոբյանի գլխավորությամբ։

Դեպքի վայր է ժամանել ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչը։ Ոստիկանությունը ձեռնարկում է անհրաժեշտ գործողություններ՝ պարզելու ինչպես վրաերթի ենթարկված մահացածի ինքնությունն, այնպես էլ՝ վրաերթի վայրից փախուստի դիմած վարորդին։ 

Լուսանկարները և տեսանյութը՝ Գագիկ Շամշյանի:

{gallery}shamshyan/vraert1502{/gallery}