Սկսվեց Հովհաննես Թամամյանի գործով դատաքննությունը. այն տևեց 50 րոպե (ՖՈՏՈՇԱՐՔ)

Այսօր՝ փետրվարի 16-ին, Երևանի Կենտրոն, Նորք-Մարաշ վարչական շրջանների ընդհանուր իրավասության դատարանի 5-րդ դահլիճում սկսվեց ոստիկանության քրեական հետախուզության գլխավոր վարչության նախկին պետ, ոստիկանության գեներալ–մայոր Հովհաննես Թամամյանի դատավարությունը։

Ինչպես դատարանից Լուրեր.com–ին հայտնում է ֆոտոլրագրող Գագիկ Շամշյանը, դատական նիստը նշանակված էր ժամը 15.00-ին, սակայն սկսվեց 20 րոպե ուշացումով, քանի որ Հովհաննես Թամամյանի գործով անցնող մյուս ամբաստանյալներ ոստիկանության Արաբկիրի բաժնի պետի օպերգծով նախկին տեղակալ Արմեն Պողոսյանին և ոստիկանության քննչական գլխավոր վարչության հատկապես կարևորագույն գործերով ավագ քննիչ Վահան Խանզադյանին ուշացումով են բերել դատարան։

Նիստը նախագահում է նշված դատարանի դատավոր Արշակ Վարդանյանը, իսկ մեղադրանքի կողմը պաշտպանում է ՀՀ գլխավոր դատախազության դատախազ Հարություն Հարությունյանը։ Սկսելով դատական նիստը՝ դատավոր Ա. Վարդանյանը տեղեկացրեց նիստի մասնակիցներին, որ Վ. Խանզադյանը միջնորդություն է ներկայացրել դատարանին, որպեսզի դատական նիստում իր շահերը պաշտպանի հանրային պաշտպանը, ինչին կողմերը չառարկեցին։

Դատարանում հավաքված են մեծ թվով քաղաքացիներ, իսկ դատարանի ամբողջ շենքը կարգադրիչների ստորաբաժանման կողմից ստորաբաժանման պետ Արթուր Փիլոսյանի գլխավորությամբ վերցվել է ուժեղացված հսկողության տակ։ Շենք մտնող ամեն քաղաքացուց պահանջում են անձը հաստատող փաստաթուղթ և զննության ենթարկում մետաղաորսիչներով, անգամ այն քաղաքացիներից, ովքեր որ դատարան են եկել ոչ թե Հովհաննես Թամամյանի գործով, այլ մեկ այլ դատաքննության մասնակցելու։

Դատական նիստը հետաձգվեց, քանի որ Վահան Խանզադյանի փաստաբան Ռուզան Սիրեկանյանը միջնորդություն ներկայացրեց դատարանին, որպեսզի ծանոթանա գործի նյութերին։ Հաջորդ դատական նիստը նշանակվեց մարտի 6-ին։

Ինչպես ավելի վաղ Լուրեր.com–ին հայտնել էր ֆոտոլրագրող Գագիկ Շամշյանը, Հովհաննես Թամամյանը մեղադրվում է ՀՀ քրեական օրենսգրքի 308 հոդվածի 1-ին մասով՝ պաշտոնական պարտականությունները չկատարելու, անձնական շահագրգռվածությունից ելնելով դիրքը ծառայության շահերին հակառակ օգտագործելու համար, որն առաջացրել է ծանր հետեւանք:

Հովհաննես Թամամյանի հետ մեղադրվող ոստիկանության Արաբկիրի բաժնի օպերատիվ բաժնի պատասխանատու Արմեն Պողոսյանին ու ՀՀ ոստիկանության քննչական գլխավոր վարչության հատկապես կարևորագույն գործերի վարչության ավագ քննիչ Վահան Խանզադյանին առաջադրվել է պաշտոնական լիազորությունների չարաշահում հոդվածը։

Լուսանկարները՝ Գագիկ Շամշյանի։

{gallery}shamshyan/tamam{/gallery}