Մերկասառույցի պատճառով ավտոմեքենան բախվել է էլեկտրասյանը, կան վիրավորներ (ՖՈՏՈ, ՏԵՍԱՆՅՈՒԹ)

Այսօր՝ փետրվարի 17-ին, ավտովթար է տեղի ունեցել Երեւանում:

Ինչպես դեպքի վայրից Լուրեր.com-ին հայտնում է ֆոտոլրագրող Գագիկ Շամշյանը, ժամը 07։00-ի սահմաններում «Օպել» մակնիշի 30 ՕՕ 583 համարանիշի ավտոմեքենայի վարորդը Ալեք Մանուկյան փողոցում (ֆիզկուլտինստիտուտի դիմաց) մերկասառույցի պատճառով դուրս է եկել ճանապարհի երթեւեկելի գոտուց եւ բախվել էլեկտրասյանը: Վարորդին եւ ավտոմեքենայի մեջ գտնվող չորս ուղեւորներին դուրս են բերել ՀՀ Արտակարգ իրավիճակների նախարարության Հայաստանի փրկարար ծառայության Երեւանի հատուկ փրկարարական ջոկատի փրկարարները:

5 վիրավորներն էլ մարմնական վնասվածքներով տեղափոխվել են Երեւանի թիվ 1 համալսարանական հիվանդանոց: Վթարի վայր են ժամանել Երեւանի ճանապարհային ոստիկանության աշխատակիցները։ Քննչական աշխատանքները ղեկավարում էր ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի հատկապես կարեւորագույն գործերով ավագ քննիչ Գագիկ Հարությունյանը: Վերջինիս հանձնարարականով՝ ավտոմեքենան քարշակի օգնությամբ տեղափոխվեց Երեւանի ՃՈ տուգանային հրապարակ: Փաստի առթիվ ՃՏՀ քննության բաժնում նյութեր են նախապատրաստվում: 

Քիչ առաջ Գ. Շամշյանը հայտնեց, որ հիվանդանոց տեղափոխված անձինք են՝ Երևան քաղաքի բնակիչներ 27-ամյա Ռոման Շառոյանը, 25-ամյա Էդուարդ Եսայանը, Հրազդան քաղաքի բնակիչներ 28-ամյա Տաթևիկ Սարգսյանը, 25-ամյա Թեմիդե Ումիդյանը, 22-ամյա Արմինե Սարգսյանը։

Լուսանկարները և տեսանյութը՝ Գագիկ Շամշյանի։

{gallery}shamshyan/dbca{/gallery}