Հուսով ենք՝ կառավարությունն այս անգամ խոսքը գործի կվերածի (ՖՈՏՈ)

Այսօր՝ փետրվարի 18-ին, արտակարգ դեպք է տեղի ունեցել Արմավիրի մարզում։

Ինչպես դեպքի վայրից Լուրեր.com–ին հայտնում է ֆոտոլրագրող Գագիկ Շամշյանը, Արմավիրի մարզի Հայկավան գյուղի բնակիչ 28-ամյա Արմեն Զաքարյանը, ով 4 տարի է նաև զբաղվում է որսորդությամբ, Հայկավան գյուղի «Թափաբլուր» սարում կարողացել է վնասազերծել հերթական գայլի։ Գյուղացիները ֆոտոլրագրողին պատմել են. «Արմենը տանն էր, երբ իր որսորդ ընկերները զանգել են, թե՝ «զենքդ վեկալ ու շուտ արի «Թափաբլուր»»։ Գայլերը վերջերս հաճախակի էին անհանգստացնում գյուղաբնակներին։

Սա Ա. Զաքարյանի վնասազերծած 3-րդ գայլն էր։ Գյուղի որսորդները կես կատակ, կես լուրջ պատմում են, որ «սաղ գյուղով ինչքան ժամանակ ա ուզում ենք գել խփենք՝ չի ստացվում, հլը որ մենակ Արմեննա կարում ու արդեն 2 էգ, 1 որձ գայլի ա խփել»։

Գ. Շամշյանը հայտնում է նաև, որ հինգշաբթի օրը կառավորությունն իր պահուստային ֆոնդից բնապահպանության նախարարությանը հատկացրել է 20 մլն դրամ, որպեսզի ամեն մեկ գայլի ոչնչացնելու համար որսորդը կամ քաղաքացին ստանա կառավարության սահմանած պարգևավճարը՝ ներկայացնելով խփված կենդանուն։ Այս առթիվ Գ. Շամշյանը խոսել է բնապահպանության նախարարության պաշտոնյայի հետ, ով հայտնել է, որ երկուշաբթի Ա. Զաքարյանն իր կողմից ոչնչացված գայլերով կներկայանա համապատասխան բաժին և կստանա պետության կողմից խոստացված գումարը։

Լուսանկարները՝ Գագիկ Շամշյանի:

{gallery}shamshyan/gayl{/gallery}