Հայտնի տեսանյութի փաստով ոստիկանությունում ուսումնասիրություն է սկսվել (ՖՈՏՈ, ՏԵՍԱՆՅՈՒԹ)

Ինչպես Լուրեր.com-ին հայտնում է ֆոտոլրագրող Գագիկ Շամշյանը, այսօր` փետրվարի 19-ին, ոստիկանության քննչական գլխավոր վարչության Կոտայքի մարզի քննչական բաժնի Կոտայքի քննչական բաժանմունքում հարուցված քրեական գործի շրջանակներում սկսել են ուսումնասիրել երեկ «Հետք» էլեկտրոնային լրատվամիջոցում տեղադրված տեսանյութը: Նշված տեսանյութում «Արայի» սեփականատիրոջ` Արմեն Պետրոսյանի կնոջ` Տատյանա Չադենկովայի սկայպով խոսակցությունն է ոմն Արթուրի հետ, որից պարզ է դառնում, որ Տատյանա Չադենկովան պատվիրել է իր ամուսնու սպանությունը 100 հազար ԱՄՆ դոլարի դիմաց:

Գ. Շամշյանին հայտնի է դարձել նաև, որ հարուցված քրեական գործի շրջանակում Տատյանան նախկինում ցուցմունքներ է տվել և այս պահին նա գտնվում է հանրապետությունում և մոտակա օրերին կրկին հրավիրվելու է քննչական բաժանմունք` այս անգամ ցուցմունք տալու հայտնի տեսանյութի կապակցությամբ:

Հնարավոր է նաև քննիչի որոշմամբ նշված տեսանյութի իսկությունը պարզելու նպատակով նշանակվեն փորձաքննություններ:

Ինչպես 2011 թվականի հոկտեմբերի 16-ին Կոտայքի մարզից Լուրեր.com-ին հայտնել էր ֆոտոլրագրող Գագիկ Շամշյանը, նույն օրը` ժամը 13.00-ի սահմաններում, ոստիկանության Կոտայքի բաժին անհայտ քաղաքացուց ահազանգ էր ստացվել, որ Սևան-Երևան ավտոմայրուղուց Գետամեջ տանող հողածածկ ճանապարհին կայանված էր «ԲՄՎ X5» մակնիշի ավտոմեքենա, որի մեջ կար դիակ: Շտապ դեպքի վայր էին մեկնել ոստիկանության Կոտայքի մարզային վարչության օպերատիվ խումբը` մարզային վարչության պետի օպերգծով տեղակալ Կորյուն Հարությունյանի, ոստիկանության քննչական գլխավոր վարչության Կոտայքի մարզի քննչական բաժնի պետ Վալենտին Պապյանի գլխավորությամբ: Դեպքի վայրում էին եղել նաև քրեական հետախուզության գլխավոր վարչության սպանությունների բաժնի պետի տեղակալ Լևոն Հովհաննիսյանը, Կազմակերպված հանցավորության դեմ պայքարի գլխավոր վարչության քրեական հետախուզության վարչության պետի տեղակալ Կորյուն Հազինյանը, ոստիկանության Կոտայքի բաժնի պետ Արթուր Գրիգորյանը, օպերգծով տեղակալ Արմեն Գասպարյանը և ոստիկանության Կոտայքի բաժնի քրեական հետախուզության բաժանմունքի պետ Հրաչյա Խոստեղյանը:

Ֆոտոլրագրող Գագիկ Շամշյանը հայտնել էր նաև, որ դեպքի վայր էին ժամանել նաև ոստիկանության քննչական գլխավոր վարչության Կոտայքի մարզի քննչական բաժնի Աբովյանի քննչական բաժանմունքի քննիչները` բաժանմունքի պետ Եղիշե Պետրոսյանի գլխավորությամբ: Օպերատիվ-քննչական խումբը նշված հատվածում հայտնաբերել էր «ԲՄՎ X5» մակնիշի 555 ՏՍ 22 համարանիշի ավտոմեքենա, որի մեջ հայտնաբերվել էր «Արայ» ՍՊԸ հիմնադիր-սեփականատեր, Երևանի բնակիչ, 31-ամյա Արմեն Արայիկի Պետրոսյանի դիակը` քունքի մասում հրազենային վնասվածքով, աջ ձեռքին, մատը ձգանին «ՏՏ» մակնիշի ատրճանակ: Քննչական մարմինը ավտոմեքենայի աջ նստատեղին դրված կաշվե սև պայուսակի միջից հայտնաբերել էր բելգիական արտադրության «Բրաունինգ» տեսակի ատրճանակ` 53 փամփուշտներով, «ՏՏ» մակնիշի ատրճանակի 6 փամփուշտ և մեկ կրակված պարկուճ: Փաստի առթիվ ոստիկանության քննչական գլխավոր վարչության Կոտայքի մարզի քննչական բաժնի Աբովյանի քննչական բաժանմունքում հարուցվել էր քրեական գործ` ՀՀ քր. օր.-ի 110 հոդվածի (ինքնասպանության հասցնելը) 1-ին մասի և 235 հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասի հատկանիշներով:

Լուսանկարները` Գագիկ Շամշյանի, տեսանյութը`«Հետք» էլեկտրոնային լրատվամիջոցի:

{gallery}shamshyan/aray{/gallery}