Մարգար Օհանյանին ազատ արձակելու որոշումը դատարանը հրապարակելու է այսօր՝ ժամը 14.00-ին (ՖՈՏՈՇԱՐՔ)

Այսօր՝ փետրվարի 20-ին, Երևանի Կենտրոն, Նորք–Մարաշ վարչական շրջանների ընդհանուր իրավասության դատարանում շարունակվեց ճանապարհային ոստիկանության նախկին պետ, ոստիկանության գնդապետ Մարգար Օհանյանի գործով դատաքննությունը։

Ինչպես դատարանից Լուրեր.com–ին հայտնում է ֆոտոլրագրող Գագիկ Շամշյանը, նախորդ դատական նիստը հետաձգվել էր այն պատճառաբանությամբ, որ այսօր դատարանում ցուցմունք տար Մարգար Օհանյանը։ Դատավոր Մխիթար Պապոյանը դատական նիստը բացելուց հետո Մարգար Օհանյանից պարզեց, թե վերջինս ցանկանո՞ւմ է ցուցմունք տալ, ինչին ՃՈ նախկին պետը պատասխանեց՝ այո, ցանկանում է։

Մինչ Մարգար Օհանյանը պատրաստվում էր ցուցմունք տալ, նրա շահերի պաշտպանը՝ Մկրտիչ Վասակյանը հայտարարեց, որ դատարանին ունի միջնորդություն։ Նա դատարանին միջնորդեց, որ իր պաշտպանյալի՝ Մարգար Օհանյանի նկատմամբ կիրառվի 3 մլն դրամի չափով գրավ, որպեսզի Մ. Օհանյանը, ով 6 ամիս գտնվում է կալանքի մեջ, ազատ արձակվի մինչև դատարանի վճիռը։

Մ. Վասակյանը միջնորդությամբ հայտնում էր նաև, որ բոլոր վկաները, այդ թվում՝ 3 ամբաստանյալները և տուժող կողմը, արդեն դատարանում ցուցմունք են տվել, հետևաբար Մ. Օհանյանը չի կարող ճնշում գործադրել նրանց վրա, չի խուսափում դատաքննությունից, նախաքննությանը ներկայացել է պատշաճ, չկան նաև փաստեր նրան մեղսագրված արարքում և չընդունելով մեղադրանքը՝ նա վերականգնել է պետությանը պատճառված 177 մլն 281 հազար 380 դրամ վնասը միայն այն բանի համար, որ իր ղեկավարած կառույցում է տեղի ունեցել նման դեպք, ուստի նա խնդրում է, որ դատարանը բավարարի իր միջնորդությունը և այդ միջնորդության բավարարմամբ դատարանը կպահպանի կողմերի հավասարությունը։

Փաստաբանի միջնորդությունից հետո միջնորդությանը միացավ նաև Մարգար Օհանյանը։ Վերջինս հայտնեց, որ դատարանում ներկա և՛ դատավորը, և՛ դատախազը ցանկալի է առաջնորդվեն ՀՀ նախագահ, գերագույն գլխավոր հրամանատար Սերժ Սարգսյանի 2011 թվականի դեկտեմբերին նախագահի նստավայրում անցկացված ուժային կառույցների պատասխանատուների հետ խորհրդակցության ժամանակ հնչեցված ցուցումով, որը տվել էր նրանց ՀՀ նախագահը, այն է՝ «Դատախազության, դատարանների և ոստիկանության կողմից չպետք է լինեն որևէ անարդարացի որոշումներ և վճիռներ, ինչը չի ներվի հանրության և իր կողմից»։

Նշված միջնորդությանը չառարկեցին անգամ ՃՈ 2-րդ սպայական գումարտակի նախկին հրամանատար, ամբաստանյալ Ստեփան Կարախանյանն ու նրա փաստաբանը, ամբաստանյալներ՝ Սամվել Մախմուրյանն ու Արա Լևոնյանը։ Միջնորդությանը դեմ արտահայտվեց մեղադրող դատախազ Հարություն Հարությունյանը, իսկ ճանապարհային ոստիկանության ներկայացուցիչը թողեց դատավորի հայեցողությանը։

Դատավոր Մխիթար Պապոյանը, լսելով կողմերին, որոշեց գնալ խորհրդակցական սենյակ, իսկ միջնորդության համար իր կողմից ընդունված որոշման մասին կհայտնի այսօր՝ ժամը 14.00-ին։

Լուսանկարները՝ Գագիկ Շամշյանի։

{gallery}shamshyan/margar2102{/gallery}