Խոշոր ավտովթար Երևանում. իրար են բախվել «Լադա», «Մերսեդես» և «ԲՄՎ» մակնիշի ավտոմեքենաներ. նախնական տվյալներով 3 մարդ տեղափոխվել է հիվանդանոց (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր՝ հոկտեմբերի 29-ին, խոշոր ավտովթար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, Սարալանջի նորակառույց ճանապարհին իրար են բախվել «Լադա» մակնիշի 19 ՏՕ 449 համարանիշի, «Մերսեդես» մակնիշի 24 ՏՕ 701 համարանիշի և «ԲՄՎ» մակնիշի 24 ՕԼ 657 համարանիշի ավտոմեքենաները:

Այս պահին դեպքի վայր են ժամանել Երևանի Ճանապարհային ոստիկանության մեծ թվով աշխատակիցներ՝ Երևանի ՃՈ պետի տեղակալ Հայկազ Մաթևոսյանի գլխավորությամբ:

Այստեղ են նաև Հայաստանի Արտակարգ իրավիճակների նախարարության, Հայաստանի փրկարար ծառայության մեծ թվով փրկարարներ, ինչպես նաև հրշեջներ: Դեպքի վայրում են նաև ԱԻՆ ՓԾԿ վարչության պետ Արթուր Խաչիկյանը,  Հայաստանի փրկարար ծառայության օպերատիվ վարչության պետ Արման Ցոլակյանը:

Դեպքի վայրում հավաքվածները հայտնել են, որ ըստ նախնական տեղեկությունների, վթարի վայրից հիվանդանոց են տեղափոխվել 3 անձ:

Հարվածի արդյունքում «ԲՄՎ» մակնիշի ավտոմեքենան դուրս է եկել ճանապարհի երթևեկելի գոտուց, հարվածել ցուցանակներին և մոտ 50-100 մետր թռել, նախկին «Երիտասարդական պալատ»-ի շինարարության տարածք: Ֆոտոլրագրողը հայտնեց որ ԲՄՎ-ի վարորդին 27-ամյա Վազգեն Դավթյանին տեղափոխել են 1-ին համալսարանական հիվանդանոց:

Այս պահին դեպքի վայր են ժամանել ապահովագրական ընկերություների ներկայացուցիչները, հսկայական խցանում է, սակայն Երևանի ՃՈ աշխատակիցները փորձում են տարածքը ազատել հետաքրքրասեր քաղաքացիներից:

Արդեն դեպքի վայր են ժամանել ոստիկանության ՔԳՎ,  ՃՏՀ քննության բաժնի քննիչները, քննիչ Դավիթ Մարտիրոսյանի գլխավորությամբ: Ավտոմեքենաները քննիչի հանձնարարականով տեղափոխվեցին Երևանի ՃՈ տուգանային հրապարակ:

Լուսանկարները և տեսանյութը՝ Գագիկ Շամշյանի