Ավտովթար` Արագածոտնում. «ՎԱԶ 2106»-ը բախվել է «Սամանդ»-ին և վերջինիս գցել գետառը. կա 1 վիրավոր (ֆոտո)

Այսօր` հոկտեմբերի 30-ին, ավտովթար է տեղի ունեցել Արագածոտնի մարզում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 13.50-ի սահմաններում Երևան-Վանաձոր ավտոճանապարհին' Արտաշավան գյուղի սկզբնամասում, «ՎԱԶ 2106» մակնիշի 26 ՕՍ 607 համարանիշի ավտոմեքենան բախվել է ճամփեզրին կայանված «Սամանդ» մակնիշի 14 ՕԼ 190 համարանիշի ավտոմեքենային:

Բախման հետևանքով «Սամանդ»-ը դուրս է եկել երթևեկելի գոտուց և հայտնվել գետառի մեջ:

Վթարի մայրից մարմնական վնասվածքներով մեկ հոգի տեղափոխվել է Աշտարակի քաղաքային հիվանդանոց:

Դեպքի վայր են ժամանել Ճանապարհային ոստիկանության 2-րդ սպայական գումարտակի Արագածոտնի մարզի Աշտարակի աշխատակիցները:

Երկու ավտոմեքենաները քարշակի օգնությամբ տեղափոխվում են Աշտարակի ոստիկանության տուգանային հրապարակ:

Ֆոտոլրագրող Գագիկ Շամշյանը հայտնում է նաև, որ գրեթե 2 ժամ 20 րոպե բոլորը ստիպված են եղել սպասել «Նաիրի ինշուրանս» ապահովագրական ընկերության ներկայացուցչին, ով պատճառաբանել է, թե իբր ճանապարհներն անանցանելի են, և դա է եղել ուշանալու պատճառը:

Ֆոտոլրագրող Գագիկ Շամշյանը, սակայն, փոխանցում է, որ ճանապարհները անանցանելի չէին:

Լուսանկարները' Գագիկ Շամշյանի