Պարզվել է, որ Սարալանջում՝ նույն տեղում, միևնույն ժամանակ տեղի են ունեցել երկու տարբեր ավտովթարներ

Հոկտեմբերի 29-ին խոշոր ավտովթար էր տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 19.00-ի սահմաններում Սարալանջի նորակառույց ճանապարհին` թիվ 23 էլեկտրասյան դիմաց, «Աթենք» ՍՊԸ-ում որպես մենեջեր աշխատող, 26-ամյա Վաչագան Հովհաննիսյանի վարած «Մերսեդես» մակնիշի 24 ՍՕ 701 համարանիշի ավտոմեքենան ընդհարվել է «Կարդինալ Ինտերնեշնլ» ՍՊԸ-ում որպես ավտոտնտեսության ղեկավար աշխատող, 61-ամյա Արմեն Հայրապետյանի վարած «ՎԱԶ 21121» մակնիշի 19 ՏՕ 449 համարանիշի ավտոմեքենային:

Վթարի հետևանքով մարմնական վնասվածքներով «Արմենիա» բժշկական կենտրոն է տեղափոխվել Վաչագան Հովհաննիսյանը, իսկ Արմեն Հայրապետյանը և նրա ուղևորներ` 64-ամյա Համլետ Համլետ Հայրապետյանը, 64-ամյա Սուսաննա Գևորգյանը մարմնական վնասվածքներով տեղափոխվել են Երևանի թիվ 1 համալսարանական հիվանդանոց:

Դեպքի վայրում քննչական աշխատանքները ղեկավարել է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Դավիթ Մարտիրոսյանը:

ՃՏՀ քննության բաժնում նյութեր են նախապատրաստվում:

Երեկ դեպքի վայրից ԼՈՒՐԵՐ.com-ին ֆոտոլրագրող Գագիկ Շամշյանը հայտնել էր, որ տեղի է ունեցել խոշոր ավտովթար. իրար են բախվել «Լադա» մակնիշի 19 ՍՕ 449 համարանիշի, «Մերսեդես» մակնիշի 24 ՏՕ 701 համարանիշի և «ԲՄՎ» մակնիշի 24 ՕԼ 657 համարանիշի ավտոմեքենաները:

Սակայն ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչի կողմից ձեռնարկված քննչական գործողությունների արդյունքում պարզվել էր, որ նույն տեղում միևնույն ժամանակ տեղի են ունեցել երկու տարբեր ավտովթարներ. մեկը` ներոնշյալը, մյուսը` «ԲՄՎ» մակնիշի ավտոմեքենան դուրս էր եկել ճանապարհի երթևեկելի գոտուց, հարվածել ցուցանակներին և մոտ 50-100 մետր թռել, նախկին «Երիտասարդական պալատ»-ի շինարարության տարածք:

Լուսանկարները՝ Գագիկ Շամշյանի