Պարզվել է, որ վրաերթը կատարել է ԱԺ պատգամավորի անվտանգության աշխատակիցը (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, երեկ` հոկտեմբերի 30-ին, գիշերը, ժամը 23.30-ի սահմաններում, ոստիկանության Մաշտոցի բաժին է մեղայականով ներկայացել 46-ամյա Սմբատ Խաչատրյանը:

Վերջինս կասկածվում է նույն օրը Հալաբյան փողոցում մահվան ելքով վրաերթ կատարելու մեջ:

Ֆոտոլրագրող Գագիկ Շամշյանը հայտնում է, որ Սմբատ Խաչատրյանը աշխատում է ոստիկանության պետական պահպանության գլխավոր վարչության անձի և անշարժ գույքի պահպանության բաժնում որպես հրաձիգ:

Ֆոտոլրագրողը հավելում է, որ նշված անձնավորությունը որպես հրաձիգ պահպանում էր ԱԺ պատգամավոր Արկադի Համբարձումյանի («Դերժավայի Արկադի») անվտանգությունը:

Վրաերթ կատարած «Ռենջ Ռովեր» մակնիշի 05 ՍՍ 500 համարանիշի ավտոմեքենան հայտնաբերվել է և տեղափոխվել Երևանի ՃՈ տուգանային հրապարակ:

Հիշեցնենք, որ երեկ` հոկտեմբերի 30-ին, վրաերթ էր տեղի ունեցել Երևանում:

Ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 20.00-ի սահմաններում Հալաբյան փողոցում «Ռենջ Ռովեր» մակնիշի անհայտ համարանիշի ավտոմեքենայի վարորդը վրաերթի է ենթարկել հետիոտնին և թողնելով նրան անօգնական վիճակում` դիմել է փախուստի:

Ապա արդեն մահացած հետիոտնը հայտնվել է թիվ 28 երթուղային տաքսու անիվների տակ:

Արդեն դեպքի վայր են ժամանել Երևանի ճանապարհային ոստիկանության մեծ թվով աշխատակիցներ` Երևանի ՃՈ պետ Արսեն Մարդոյանի գլխավորությամբ:

Դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի հատկապես կարևոր գործերով ավագ քննիչ Կարեն Ստեփանյանը:

Դեպքի վայր են ժամանել նաև Արտակարգ իրավիճակների նախարարության Հայաստանի փրկարար ծառայության օպերատիվ խումբը` պարամեդիկների խմբի հետ:

Այստեղ են նաև 1-03 շտապբուժօգնության աշխատակիցները, ինչպես նաև ոստիկանության Մաշտոցի բաժնի օպերատիվ խումբը:

Վրաերթի ենթարկվածը, որը, ինչպես արդեն նշեցինք, տեղում մահացել է, միջին տարիքի մի կին է:

Ֆոտոլրագրող Գագիկ Շամշյանը հայտնեց նաև, որ դեպքի վայրում հավաքվածները պատմել են, որ կինը թիվ 28 երթուղայինի տակ է հայտնվել այն բանից հետո, երբ «Ռենջ ռովեր» մակնիշի ավտոմեքենան նրան վրաերթի է ենթարկել և հարվածի ուժով շպրտել:

Այս պահին ոստիկանությունը ձեռնարկում է օպերատիվ-քննչական գործողություններ` հայտնաբերելու համար «Ռենջ ռովերի» վարորդին, ով դեպքի վայրից դիմել էր փախուստի:

Քիչ առաջ հայտնի դարձավ, որ ոստիկանությունը պարզել է վրաերթի ենթարկված և մահացած կնոջ ինքնությունը. նա Արաբկիր վարչական շրջանի բնակիչ Դոնարա Հարությունյանն էր, ով աշխատում էր Վերահսկիչ պալատում:

Լուսանկարները` Գագիկ Շամշյանի