Մի քանի ժամում իրացվեց 300-ից ավելի 1000 դրամանոց կեղծ կտրոններ (ՖՈՏՈ)

Այսօր՝ փետրվարի 26-ին, առավոտյան ժամը 10-ից ճանապարհային ոստիկանության 1-ին սպայական գումարտակի աշխատակիցները փորձում են Էրեբունի թանգարանից դեպի Նուբարաշենի խճուղի տանող ճանապարհահատվածից հեռացնել ավտոշուկա ժամանած այն ավտոմեքենաների վարորդներին իրենց ավտոմեքենաներով, ովքեր ավտոմեքենաները կայանել են չթույլատրելի գոտում։

Ինչպես Լուրեր.com-ին հայտնում է ֆոտոլրագրող Գագիկ Շամշյանը, մեքենաները կայանվել են անգամ այն հատվածներում, որտեղ որ տեղադրված են արգելող նշաններ։ ՃՈ աշխատակիցները վարորդներին հիմնականում հորդորում են, որպեսզի ավտոմեքենաները դուրս բերեն, քանի որ այդ հատվածով են երթևեկում տրանսպորտային մի քանի միջոցներ և այդ ճանապարհով են «Նուբարաշեն» քրեակատարողական հիմնարկ, «Նուբարաշեն» հոգեբուժական հիվանդանոց, ինչպես նաև Նուբարաշեն և Արարատի մարզի որոշ գյուղեր մեկնում քաղաքացիները։

Վարորդներն արդարանում են, որ իրենք ավտոմեքենաները կայանել էին, քանի որ ինչ–որ անձնավորություն իրենց է տվել 1000 դրամանոց կտրոն և հայտնել, որ ոչ մի խնդիր չկա, իրենց նկատմամբ ՃՈ աշխատակիցը վարչական ակտ չի կազմի և որ այս ամենը համաձայնեցվել է քաղաքային և տեղական իշխանության ներկայացուցիչների հետ։

Կտրոնները թվագրված էին 2011 թվականով և չունեին ոչ մի կնիք։ Այս պահին ավտոշուկա է ժամանել Երևանի ճանապարհային ոստիկանության պետ, գնդապետ Եղիշ Ենգիբարյանը, ում կանչով ժամանել են նաև ոստիկանության Էրեբունու բաժնի համապատասխան ծառայության աշխատակիցները, ովքեր այս պահին փորձում են հայտնաբերել կեղծ կտրոններն ավտոշուկա ժամանած վարորդներին վաճառած անձին։

ՃՈ աշխատակիցները, ընդառաջելով վարորդներին, դադարեցրեցին նրանց նկատմամբ վարչական ակտեր կազմել, քանի որ նրանք թյուրիմացության մեջ են ընկել, իսկ Ե. Ենգիբարյանը հորդորեց վարորդներին, որպեսզի զգույշ լինեն, քանի որ կտրոնները կեղծ են և իրենք իրավունք չունեն ավտոմեքենաները կայանել նշված հատվածում։

Այնուամենայնիվ, ՃՈ աշխատակիցները մի քանի արտասահմանյան մակնիշի ավտոմեքենաներ՝ հիմնականում ջիպեր, քարշակի օգնությամբ տեղափոխեցին Երևանի ՃՈ տուգանային հրապարակ, քանի որ մեքենաների վարորդները 30 րոպեից ավել չէին մոտենում ավտոմեքենաներին, ինչքան էլ որ ՃՈ աշխատակիցները բարձրախոսներով նրանց հրավիրում էին ավտոմեքենաների մոտ։

Ավտոշուկայում հավաքվածները Գ. Շամշյանին պատմել են, որ անկոչ տոմսավաճառը կարողացել է իրացնել 300-ից ավելի տոմսեր։

{gallery}shamshyan/avtoshuka{/gallery}