Կոտայքի ոստիկանության օպերատիվ-քննչական խումբը պարզել է դիակի ինքնությունը (ՖՈՏՈ, ՏԵՍԱՆՅՈՒԹ)

Քիչ առաջ ԼՈՒՐԵՐ.com-ին ֆոտոլրագրող Գագիկ Շամշյանը հայտնեց, որ ոստիկանության Կոտայքի մարզային վարչության օպերատիվ-քննչական խումբը պարզել է այսօր Աբովյան քաղաքի Երիտասարդական փողոցի վրա գտնվող երկաթգծին հարակից տարածքում հայտնաբերված դիակի ինքնությունը: Նա Կոտայքի մարզի Ջրվեժ գյուղի բնակիչ, 55-ամյա Կարապետ Գաբրիելյանն էր: Հիշեցնենք, որ ինչպես այսօր` ավելի վաղ, դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, անհայտ քաղաքացին ահազանգել է ոստիկանության Կոտայքի բաժին և հայտնել, որ Աբովյան քաղաքի Երիտասարդական փողոցի վրա գտնվող երկաթգծին հարակից տարածքում տղամարդու դիակ կա: Դեպքի վայր էին ժամանել ոստիկանության Կոտայքի մարզային վարչության օպերատիվ խումբը` մարզային վարչության պետ Գրիշա Բադալյանի գլխավորությամբ: Նշված վայր են ժամանել նաև ոստիկանության քննչական գլխավոր վարչության Կոտայքի քննչական բաժանմունքի քննիչները` քննչական բաժանմունքի պետ Եղիշ Պետրոսյանի գլխավորությամբ: Դատաբժշկի նախնական եզրակացությամբ, դիակի վրա բռնության հետքեր չկան: Քննչական բաժանմունքի ավագ քննիչ Սմբատ Մինասյանի որոշմամբ, նշանակվել են մի շարք փորձաքննություններ, այդ թվում` դիակի դատաբժշկական, հետքաբանական, մատնադրոշմային և այլն: Դիակի հայտնաբերման վայրում հավաքվածները ֆոտոլրագրող Գագիկ Շամշյանին հայտնել են, որ մահացածը եղել է թափառաշրջիկ, իսկ նրա դիակի մոտ հայտնաբերվել են գարեջրի դատարկ շշեր: Դեպքի վայր էին ժամանել նաև ոստիկանության կազմակերպված հանցավորության դեմ պայքարի գլխավոր վարչության աշխատակիցները: Հաշված րոպեների ընթացքում ոստիկանության Կոտայքի բաժնի աշխատակիցները դեպքի վայր բերեցին մեծ թվով թափառաշրջիկների, որպեսզի ճշտեն մահացածի ինքնությունը: Նրանցից ոչ ոք չկարողացավ կոնկրետ ասել մահացածի տվյալները, սակայն շատերը նշում էին, որ մահացածի հետ մի քանի անգամ խմել են, բայց անունը չգիտեն: Լուսանկարները և տեսանյութը` Գագիկ Շամշյանի