Հայտնաբերվել է մի ամբողջ զինանոց, այդ թվում՝ 12 «Կալաշնիկով» և 9 գնդացիր (ֆոտո, տեսանյութ)

Այսօր՝ փետրվարի 29-ին, ոստիկանության Նոր-Նորքի բաժնի և Ավանի բաժանմունքի աշխատակիցներն օպերատիվ տեղեկություն են ունեցել, որ իրենց վարչական տարածքում գտնվող շինություններից մեկում կա մեծ քանակությամբ զենք–զինամթերք։

Ինչպես Լուրեր.com–ին հայտնում է ֆոտոլրագրող Գագիկ Շամշյանը, նշված տեղեկությունը ճշտելու նպատակով ոստիկանության Նոր-Նորքի բաժնում ստեղծվում է օպերատիվ խումբ՝ Նոր-Նորքի բաժնի պետ, ոստիկանության գնդապետ Արմեն Վաթյանի գլխավորությամբ։ Օպերատիվ խումբը բաժանվում է նաև մի քանի խմբերի, որոնք ղեկավարել են Նոր-Նորքի ոստիկանապետի օպերգծով տեղակալ Վալերի Բաղյանի, ոստիկանության Նոր-Նորքի քրեական հետախուզության բաժանմունքի պետ Արսեն Մեխակյանի և բաժնի պետի ծառայության գծով տեղակալ, փոխգնդապետ Վարդան Գևորգյանի, Ավանի բաժանմունքի պետ Ռոման Կիրակոսյանի գլխավորությամբ։

Գ. Շամշյանը հայտնում է, որ նշված օպերատիվ խմբերը մի քանի օր օպերատիվ–հետախուզական աշխատանքներ են կատարել և երբ համոզվել են, որ արդեն տեղեկությունները հավաստի են, դիմել են Երևանի Ավան, Նոր-Նորք վարչական շրջանների ընդհանուր իրավասության դատարան, որտեղից էլ ստացել են խուզարկության որոշում։

Քիչ առաջ ստանալով դատարանի թույլատրության որոշումը՝ Նոր-Նորքի ոստիկանները Մոլդովական 12 հասցեում գտնվող նախկին կաթսայատանը կից շինության մեջ հայտնաբերել են մեծ քանակությամբ զենք–զինամթերք, այդ թվում՝ 12 հատ «Կալաշնիկով» տեսակի ինքնաձիգ՝ իր պահունակներով, 9 հատ «ПK» տեսակի գնդացիր, 4 հատ հակատանկային ականանետ, СВД տեսակի հրազեն՝ դիպուկահարի հարմարանքներով, 4 տասնյակից ավելի F1 տեսակի նռնակներ և մեծ քանակությամբ տարբեր տեսակի և տրամաչափի փամփուշտներ։ Հայտնաբերվել են նաև մեծ քանակի «Ամունալ» և «Տրոտիլ» տեսակի պայթուցիկներ՝ իրենց պայթուցիչներով։

Ֆոտոլրագրողը դեպքի վայրից հայտնում է, որ հայտնաբերված զենք–զինամթերքն այնքան շատ է, որ չի կարողանում թվարկել ամբողջական կազմը։ Դեպքի վայրում հավաքված քաղաքացիները կես–կատակ կես–լուրջ պատմում էին, որ  հայտնաբերված զենք–զինամթերքով կարելի է զինել մի ամբողջ բանակային կորպուս։

Դեպքի վայր է ժամանել ՀՀ ոստիկանության պետ, գեներալ–լեյտենանտ Վլադիմիր Գասպարյանը։

Դեպքի վայրում քննչական աշխատանքները կազմակերելու համար ժամանել են ոստիկանության քննչական գլխավոր վարչության Երևան քաղաքի քննչական վարչության պետ Գևորգ Գևորգյանը։ Քննիչների հանձնարարականով դեպքի վայր են ժամանել նաև ՀՀ ՊՆ սակրավորները։ Այս պահին ոստիկանության Նոր-Նորքի քննչական բաժնի աշխատակիցները՝ բաժնի պետ Մհեր Վարդանյանի գլխավորությամբ, ընթերականների ներկայությամբ դեպքի վայրում խուզարկության արձանագրություն են կազմում։ Ի դեպ, հայտնաբերված զենքն ու զինամթերքը գտնվում է բնակելի տարածքներին շատ մոտ և եթե ոստիկանությունը չհայտնաբերեր նշվածը, հնարավոր է՝ տեղի ունենար պայթյուն, ինչն ավելի ողբերգական հետևանքներ կունենար։ Առգրավված ողջ զենք–զինամթերքն ուղարկվելու է ոստիկանության փորձաքրեագիտական կենտրոն։

Նշված շինությունը պատկանում է Երևանի բնակիչ, Նոր-Նորքի 2-րդ զանգվածում գտնվող նախկին ուսանողական հանրակացարանի պարետ, 47-ամյա Արշավիր Կարապետյանին։ Նախաքննության շահերից ելնելով՝ ֆոտոլրագրողն այս պահին որոշ մանրամասներ չի հայտնում։

Փաստի առթիվ ոստիկանության Նոր-Նորքի քննչական բաժնում հարուցվել է քրեական գործ ՀՀ քրօր–ի 235 հոդվածի 1-ին մասի հատկանիշներով։

{gallery}shamshyan/zinanoc{/gallery}