«Ջրահարս» հյուրանոցային համալիրի մոտ գյուղապետի ազգականը «Միցուբիշի պաջերո»–ով վթար է ստեղծել (Լրացված, Ֆոտո, Տեսանյութ)

Այսօր՝ մարտի 1-ին, ավտովթար է տեղի ունեցել Արարատի մարզում։

Ինչպես դեպքի վայրից Լուրեր.com–ին հայտնում է ֆոտոլրագրող Գագիկ Շամշյանը, ժամը 21.00–ի սահմաններում Երևան–Արտաշատ ավտոճանապարհի Այնթապ գյուղի օղակաձև խաչմերուկում «Միցուբիշի պաջերո» մակնիշի 55 VV 553 համարանիշի ավտոմեքենայի վարորդը դուրս է եկել հանդիպակաց գոտի, բախվել «Դեյվու» Լ 2173 համարանիշի տաքսի ավտոմեքենային, այնուհետև 30 մետր վարելով՝ բախվել է «Ֆորդ տրանզիտ» մակնիշի 27 ՍՍ 808 համարանիշի ավտոմեքենային։

Վթարի հետևանքով, ըստ դեպքի վայրում հավաքվածների, մարմնական վնասվածքներով 4 հոգի տեղափոխվել են երկուսը Մասիսի, երկուսը ՝ Արտաշատի քաղաքային հիվանդանոցներ։

Վթարի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ հրամանատար Սանասար Հարությունյանի գլխավորությամբ։

Տեղում է նաև ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքի քննիչ Վահե Ավետիսյանը։ Քննիչի հանձնարարականով ավտոմեքենաները տեղափոխվելու են ոստիկանության Մասիսի բաժնի տուգանային հրապարակ։

Քննիչի հանձնարարականով ոստիկանությունն այս պահին փորձում է ճշտել վիրավոր անձանց և վարորդների ինքնությունը։

Վթարի վայրում հավաքվածները ֆոտոլրագրողին պատմել են, որ «Միցուբիշի պաջերո»–ն վարել է Լանջազատի (նախկին Զովաշեն) գյուղապետ Հրայր Հակոբջանյանի ազգականը, ով վթարի վայրից դիմել է փախուստի։ Գ. Շամշյանը հայտնում է, որ վթարի վայրում էր նաև Լանջազատի գյուղապետը, սակայն տեսնելով ֆոտոլրագրողին՝ վթարի վայրից հեռացավ։ Իրականությանը համապատասխանո՞ւմ է այն տեղեկությունը, որ «Միցուբիշի պաջերո»–ի վարորդը վթարի վայրից դիմել է փախուստի, թե՞՝ ոչ, դա պետք է պարզվի Մասիսի քննչական բաժանմունքում։

Քիչ առաջ ֆոտոլրագրողը հայտնեց, որ «Միցուբիշի պաջերո»–ն վարել է Արարատի մարզի Լանջազատ գյուղի բնակիչ, 32-ամյա Վարդան Հակոբջանյանը, «Ֆորդ տրանզիտ»–ը վարել է Արտաշատ քաղաքի բնակիչ, 43-ամյա Արամ Պողոսյանը, «Ֆորդ տրանզիտ»-ի ուղևորն է եղել Ա. Պողոսյանի հայրը՝ 73-ամյա Հրաչ Պողոսյանը, իսկ «Դեյվու»–ն վարել է Երևանի բնակիչ, 58-ամյա Նորիկ Խանդանյանը։

{gallery}shamshyan/jrahars0103{/gallery}