Ավտովթարի ենթարկված եղբայրներից մեկը մահացել է (ֆոտո, տեսանյութ)

Ինչպես ԼՈՒՐԵՐ.com-ին հայտնեց ֆոտոլրագրող Գագիկ Շամշյանը, հոկտեմբերի 23-ին Նոր Նորքում տեղի ունեցած ավտովթարի վերաբերյալ քննչական վարույթը ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնից տեղափոխվել է Հատուկ քննչական ծառայություն, քանի որ «Մերսեդես» մակնիշի 24 ՏՕ 595 համարանիշի ավտոմեքենայի վարորդը՝ Լևոն Մոսոյանը, Ազգային անվտանգության ծառայության աշխատակից է:

Ֆոտոլրագրող Գագիկ Շամշյանին հայտի է դարձել նաև, որ հիվանդանոցում մահացել է «Մերսեդես» ավտոմեքենայի ուղևորներից մեկը' Երևանի պետական ագրարային համալսարանի ուսանող, 21-ամյա Արման Սարգսյանը:

Մյուս ուղևորը' Երևանի պետական ճարտարագիտական համալսարանի ուսանող, 19-ամյա Արտակ Սարգսյանը, և վարորդ Լևոն Մոսոյանը գտնվում են Սուրբ Գրիգոր Լուսավորիչ բժշկական կենտրոնում:

Հիշեցնենք, որ ինչպես արդեն հաղորդել էր ԼՈՒՐԵՐ.com-ը, հոկտեմբերի 23-ին ավտովթար էր տեղի ունեցել Երևանում:

Ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 16.40-ի սահմաններում «Մերսեդես» մակնիշի 24 ՏՕ 595 համարանիշի ավտոմեքենայի վարորդը Նոր Նորք վարչական շրջանի Շապրոնի փողոցում դուրս էր եկել երթևեկելի գոտուց, բախվել ճանապարհի եզրաքարերին և վթարի ենթարկվել:

Դեպքի վայրում ականատեսները ֆոտոլրագրող Գագիկ Շամշյանին պատմել են, որ վթարից հետո վարորդն ու երկու ուղևորները դուրս են շպրտվել ավտոմեքենայից: Ֆոտոլրագրողը դեպքի վայրում տեսել է վթարի ենթարկվածների կոշիկները, որոնք դուրս են «թռել» վթարի ենթարկված անձանց ոտքերից:

Վարորդը և երկու ուղևորները մարմնական վնասվածքներով տեղափոխվել են Սուրբ Գրիգոր Լուսավորիչ բժշկական կենտրոն:

Քիչ առաջ ֆոտոլրագրող Գագիկ Շամշյանը հայտնեց, որ նշված երեք երիտասարդներն են' 20-25 տարեկան Լևոն Մոսոյանը, Երևանի պետական ագրարային համալսարանի ուսանող, 21-ամյա Արման Սարգսյանը և Երևանի պետական ճարտարագիտական համալսարանի ուսանող, 19-ամյա Արտակ Սարգսյանը:

Արման Սարգսյանը և Արտակ Սարգսյանը եղբայրներ են:

Ֆոտոլրագրող Գագիկ Շամշյանին հայտնի է դարձել, որ Լևոն Մոսոյանի և եղբայրներից մեկի վիճակը բժիշկները գնահատում են որպես ծայրահեղ ծանր:

Դեպքի վայր է ժամանել Նոր Նորք վարչական շրջանի ոստիկանության օպերատիվ խումբը:

Դեպքի վայրում են նաև Երևանի ճանապարհային ոստիկանության աշխատակիցները:

Դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Արսեն Մարգարյանը:

Նրա հանձնարարականով, ավտոմեքենան տեղափոխվել է Երևանի ՃՈ տուգանային հրապարակ:

Ականատեսները ֆոտոլրագրող Գագիկ Շամշյանին նաև պատմել են, որ բարեբախտաբար, ավտոմեքենան չի մխրճվել վթարի վայրի հարևանությամբ գործող բենզալցակայանի մեջ, հակառակ դեպքում' վթարը շատ ավելի ողբերգական հետևանքներ կարող էր ունենալ ոչ միայն բուն մասնակիցների, այլև բենզալցակայանի աշխատակիցների և հարևան շենքերի բնակիչների համար:

Ականատեսները ֆոտոլրագրող Գագիկ Շամշյանին հայտնել են, որ ավտոմեքենայի վարորդը ուժային կառույցի աշխատակից է:

Լուսանկարները՝ Գագիկ Շամշյանի