ՀՀ ԱԻՆ և Հայկական Կարմիր խաչ. համագործակցություն և փոխօգնություն (Ֆոտոշարք)

ՀՀ արտակարգ իրավիճակների նախարար Արմեն Երիցյանը և Հայկական Կարմիր խաչի ընկերության նախագահ Մխիթար Մնացականյանը այսօր ստորագրել են փոխըմբռնման հուշագիր' արտակարգ իրավիճակներում բնակչության պաշտպանության ոլորտում համագործակցության և փոխօգնության մասին։ Այս մասին ասված է ՀՀ ԱԻՆ պաշտոնական կայքում տեղադրված հաղորդագրության մեջ:

«Հայկական Կարմիր խաչը միշտ կանգնած է եղել մեր կողքին և դժվարի պահերին միշտ զգացել ենք ձեր աջակցությունը, ինչի համար ուզում եմ շնորհակալություն հայտնել,- ասաց ԱԻ նախարար Ա. Երիցյանը,- այս հուշագրի շնորհիվ մեր փոխգործակցությունն ավելի կսերտանա, և մենք միասին կգնանք առաջ»։

Հայկական Կարմիր խաչի ընկերության նախագահ Մխիթար Մնացականյանը նշեց, որ իրենց համար մեծ պատիվ է համագործակցել այսպիսի կայացած ու մրցունակ կառույցի հետ, որը նաև հանդիսանում է պետության կարևորագույն օղակներից։
«Աղետների դեպքում ամենամեծ կորուստն ունենում են նրանք, ովքեր չեն կարողանում կառավարել։ Ցանկացած աղետի դեպքում' լինի բնական, թե տեխնածին յուրաքանչյուրը պիտի իմանա իր տեղն ու դերը և պատրաստ լինի օգնել»,- ասաց Մ. Մնացականյանը,- մենք պատրաստակամ ենք աջակցել արտակարգ իրավիճակների նախարարությանն իր գործունեության բոլոր այն ուղղություններով, որոնք նախանշել է ՀՀ կառավարությունը։

Ելնելով արտակարգ իրավիճակների ոլորտում միասնական առաքելությունից և խնդիրներից' հուշագրով նախատեսված են համագործակցության հետևյալ ուղղությունները.
• համագործակցություն ՀՀ Աղետների ռիսկի նվազեցման ազգային պլատֆորմի գործունեության շրջանակներում.
• կողմերին ենթակա կառույցներում ներգրավված ուժերի ընդգրկում աշխատանքային ծրագրերով նախատեսված համապատասխան գործողություններում.
• արտակարգ իրավիճակներում յուրաքանչյուրի ունեցած կապի միջոցների հասանելիություն' համատեղ օգտագործման համար.
• միմյանց պարբերաբար տեղեկությունների տրամադրում առկա ուժերի և տեխնիկական միջոցների վերաբերյալ.
• համագործակցություն աղետների հակազդման, պատրաստվածության, ռիսկի նվազեցման և կանխման ուղղությամբ' բնակչության և համայնքների խոցելիությունը նվազեցնելու նպատակով.
• համագործակցություն կլիմայի փոփոխության ադապտացման և հետևանքների նվազեցման ուղղությամբ.
• անհրաժեշտության դեպքում ՀԿԽԸ արձագանքման համակարգի ուժերի ընդգրկում աղետների հետևանքների վերացման աշխատանքներում.
• միմյանց հրատապ տեղեկությունների տրամադրում աղետի գոտուց' ներառյալ աղետի գոտու մատչելիության և աղետի ազդեցության մասին առաջին ձեռքից ստացված տեղեկատվությունը.
• համագործակցություն իրավիճակի մասին զեկույցների համար անհրաժեշտ տեղեկատվություն հավաքելու և վերլուծելու գործում.
• բնակչության աղետներին պատրաստվածության և հանրային իրազեկման ոլորտներում համատեղ ծրագրերի իրականացում, մասնավորապես ՀՀ դպրոցներում' ուսումնական դասընթացներ, խաղ-վարժանքներ, տարահանումներ, ինչպես նաև ուսումնական նյութերի մշակում և տպագրություն:

Հուշագրի ստորագրման արարողությունից հետո Հայկական Կարմիր խաչի ընկերության նախագահը նախարար Ա. Երիցյանի ուղեկցությամբ այցելեց նաև ԱԻՆ նորագույն տեխնոլոգիաներով հագեցած Ճգնաժամային կառավարման կենտրոն' ծանոթանալու դրա աշխատանքին ու հնարավորություններին։

{gallery}shamshyan/0603ain{/gallery}