«Ֆոլցվագեն»–ը, կոտրելով գիշերային ակումբի գովազդային վահանակը, իջել է սանդուղքներով և հայտնվել մուտքի դռան առջև. կա 2 վիրավոր (ՖՈՏՈ, ՏԵՍԱՆՅՈՒԹ)

Այսօր` նոյեմբերի 2-ին, ավտովթար է տեղի ունեցել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 01.00-ի սահմաններում Արցախի փողոցի թիվ 1 հասցեի դիմաց 46-ամյա Լյուդվիգ Կնյազյանը, վարելով «Ֆոլցվագեն» մակնիշի 27 ՕՕ 490 համարանիշի ավտոմեքենան, դուրս է եկել ճանապարհի երթևեկելի մասից, ընդհարվել «Թայմս սքուեր» գիշերային ակումբի գովազդային վահանակին, այնուհետև իջել է գիշերային ակումբի սանդուղքներով և հայտնվել ակումբի մուտքի դռան առջև:

Վթարի հետևանքով վարորդը` Լյուդվիգ Կնյազյանը, և նրա որդին` 21-ամյա Հովիկ Կնյազյանը, մարմնական վնասվածքներով տեղափոխվել են «Էրեբունի» բժշկական կենտրոն:

Դեպքի վայրում քննչական աշխատանքները ղեկավարում էր ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Խաչիկ Սամվելյանը:

Նրա հանձնարարականով, ավտոմեքենան տեղափոխվեց Երևանի ՃՈ տուգանային հրապարակ:

Վիրավորներին ավտոմեքենայից դուրս բերելու համար դեպքի վայր էին ժամանել ՀՀ արտակարգ իրավիճակների նախարարության Հայաստանի փրկարար ծառայության Երևանի փրկարարական վարչության աշխատակիցները:

Լուսանկարները և տեսանյութը` Գագիկ Շամշյանի