«ԿԱՄԱԶ»–ի վարորդը վթարի է ենթարկել 83–ամյա կնոջը

Երեկ՝ նոյեմբերի 1-ին, վրաերթ է տեղի ունեցել Երևանում:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 19:10-ի սահմաններում 44-ամյա Էդմոն Ասատրյանը, վարելով «ԿԱՄԱԶ» մակնիշի 08 OU 876 համարանիշի բեռնատար ավտոմեքենան, Տիգրան Մեծ 71 շենքի դիմաց՝ «Սասունցի Դավիթ» մետրոյին մերձակա հրապարակի տարածքում, վրաերթի է ենթարկել 83-ամյա Արևհատ Մելիքյանին:

83-ամյա Արևհատ Մելիքյանը մարմնական վնասվածքներով «Էրեբունի» բժշկական կենտրոն տեղափոխվելու ճանապարհին մահացել է:

Փաստի առթիվ ոստիկանության քննչական գլխավոր վարչության Երևանի քննչական վարչության Ճանապարհատրանսպորտային հանցագործությունների քննության բաժնի քննիչ Խաչիկ Սամվելյանի կողմից նյութեր են նախապատրաստվում:

Քննչական մարմինը ձեռնարկում է օպերատիվ-քննչական միջոցառումներ՝ պարզելու համար մահացածի ինքնությունը:

Ավտոմեքենան տեղափոխվել է Ճանապարհային ոստիկանության տուգանային հրապարակ:

Ֆոտոլրագրող Գագիկ Շամշյանը հայտնեց, որ Էդմոն Ասատրյանն աշխատում է «ՀԱՍ-ՄԵԽ» ՍՊԸ-ում:

Լուսանկարները և տեսանյութը՝ Գագիկ Շամշյանի