ՇՏԱՊ. Դարպաս գյուղի մերձակա անտառում՝ հարազատ հոր ու կնոջ սպանության կասկածանքով ձերբակալվել է 34-ամյա Մարտին Աբրահամյանը

Ինչպես ԼՈՒՐԵՐ.com-ին հայտնեց ֆոտոլրագրող Գագիկ Շամշյանը, երեկ նոյեմբերի 2-ին ժամը 23:30-ի սահմաններում ոստիկանության Լոռու մարզային վարչության օպերատիվ քննչական խումբը, Դարպաս գյուղի մերձակա անտառում սեփական հորն ու կնոջ սպանության կասկածանքով ձերբակալվել է 34-ամյա Մարտին Աբրահամյանը: Ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, նոյեմբերի 2-ին, ժամը 7.40-ին ոստիկանության Գուգարքի բաժին ահազանգ է ստացվել Վանաձորի հիվանդանոցից այն մասին, որ մահացած վիճակում շնչափողի և ճակատային մասերում կտրված վերքերով Լոռու մարզի Դարպաս գյուղից իրենց մոտ է տեղափոխվել 60-ամյա Վահան Աբրահամյանը:

Հիվանդանոց էր մեկնել ոստիկանության օպերատիվ խումբը` Լոռու մարզի ոստիկանության պետ Անուբախ Համբարյանի և Գուգարքի բաժնի պետ Էրիկ Շարմազանովի գլխավորությամբ:

Պարզվել էր, որ նույն օրը` ժամը 07.00-ի սահմաններում, 34-ամյա Մարտին Աբրահամյանը իր մոտ եղած դանակով Դարպաս գյուղում հարվածներ էր հասցրել իր կնոջը` Արմինե Շիրինյանին, և նույն տանը բնակվող իր հորը` Վահան Աբրահամյանին:

Ա. Շիրինյանը տեղում մահացել էր, իսկ Վ. Աբրահամյանը մահացել էր հիվանդանոցի ճանապարհին:

Փաստի առթիվ ոստիկանության քննչական գլխավոր վարչության Լոռու մարզի քննչական բաժնում հարուցվել էր քրեական գործ` ՀՀ քրօր.-ի 104 հոդվածի (սպանություն) հատկանիշներով:

Ոստիկանության օպերատիվ-քննչական խումբը ձեռնարկել էր օպերատիվ գործողություններ` հայտնաբերելու սպանություն կատարող անձին` 34-ամյա Մարտին Աբրահամյանին:

Դեպքի վայրում էին եղել նաև ոստիկանության քննչական գլխավոր վարչության Լոռու մարզի քննչական բաժնի քննիչները` բաժնի պետ Գագիկ Իսպիրյանի գլխավորությամբ:

Ֆոտոլրագրող Գագիկ Շամշյանը հայտնել էր նաև, որ ոստիկանության Լոռու մարզային վարչության մեծ թվով աշխատակիցներ Դարպաս գյուղին հարակից անտառներում են, քանի որ տեղեկություն կար, որ սպանությունը կատարելուց հետո Մարտին Աբրահամյանը փախել է անտառ:

Դեպքի վայրում հավաքված հարևանները ֆոտոլրագրողին հայտնել են, որ Մարտին Աբրահամյանը հոգեկան հիվանդ է, սակայն դա վերջնականապես կպարզվի միայն այն ժամանակ, երբ ոստիկանները ձերբակալեն նրան, քննիչի որոշմամբ, նշանակվեն մի շարք փորձաքննություններ, այդ թվում` դատահոգեբանական, ինչի եզրակացությունն էլ կա՛մ կհաստատի, կա՛մ կհերքի այդ տեղեկությունը:

Ոստիկաններին հաջողվել է հայտնաբերել հանցագործության գործիք դանակը:

Լուսանկարները` Գագիկ Շամշյանի