Մարգար Օհանյանի դատը հետաձգվեց. փաստաբանը վատառողջ է (Ֆոտո)

Այսօր՝ մարտի 13-ին, Երևանի Կենտրոն և Նորք-Մարաշ ընդհանուր իրավասության դատարանում շարունակվեց ճանապարհային ոստիկանության պետ, ոստիկանության գնդապետ Մարգար Օհանյանի գործով դատավարությունը։ Ինչպես դատարանից Լուրեր.com-ին հայտնում է ֆոտոլրագրող Գագիկ Շամշյանը, դատական նիստը հետաձգվեց, քանի որ Մարգար Օհանյանի փաստաբան Մկրտիչ Վասակյանը վատառողջ լինելու պատճառով չէր ներկայացել դատարան։

Ինչպես փետրվարի 24-ին դատարանից Լուրեր.com-ին հայտնել էր ֆոտոլրագրող Գագիկ Շամշյանը, նախորդ դատական նիստում ցուցմունք էր տվել Մարգար Օհանյանը, որից հետո դատական նիստը հետաձգվել էր։ Մեղադրող դատախազ Հարություն Հարությունյանը դատարանին ներկայացրել էր քրեական գործում եղած ամբաստանյալներ ճանապարհային ոստիկանության 2-րդ սպայական գումարտակի նախկին հրամանատար Ստեփան Կարախանյանի, ՃՈ աշխատակիցներ Արա Լևոնյանի և Սամվել Մախմուրյանի ցուցմունքները՝ գրված Հայաստանի Հատուկ քննչական ծառայությունում։

Ցուցմունքերը վերաբերվում էին մի շարք առերեսումներին, որոնք կատարվել էին ՀՔԾ–ում՝ քննիչի ներկայությամբ։ Մինչ դատական նիստը սկսվելը հարց ուղղվեց Մարգար Օհանյանին, թե ինքը ինչպե՞ս կմեկնաբանի նախկին ոստիկանության պետ Ալիկ Սարգսյանի պարզաբանումը, որ նախկին ոստիկանապետը երբևէ չի հետապնդել Մարգար Օհանյանին։ Օհանյանը պատասխանեց, որ իր խոսքերը հավաստի են, ոչինչ չափազանցված չէ, համապատասխանում են իրականությանը և «կարող եք ստուգել ոստիկանության կադրերի վարչությունում, ինչպես նաև, փառք Աստծո, Ստեփան Կարախանյանը դեռ ողջ է և ունի փաստաբան, ով ոչնչից չի վախենում, կարող եք դիմել իրեն»։

Մ. Օհանյանը հայտնեց նաև, որ եթե դատական իր նիստի ժամանակ ինչ–որ սպաներ ասում էին, թե իբրև ունեն հիշողության կորուստներ և որոշ բաներ չէին հիշում, ապա դժվար թե ոստիկանության նախկին պետը, ով կոչումով գեներալ–լեյտենանտ է, հիշողության կորուստներ ունենա։

{gallery}shamshyan/margar2102{/gallery}