Խուլիգանություն գործած և նռնակ նետած երիտասարդին դատարանը կալանավորել է (ֆոտո, տեսանյութ)

Այսօր՝ նոյեմբերի 4-ին, ֆոտոլրագրող Գագիկ Շամշյանը ԼՈՒՐԵՐ.com-ին հայտնեց, որ Արագածոտնի մարզի ընդհանուր իրավասության դատարանը դռնփակ դատական նիստում որոշել է բավարարել քննչական մարմնի միջնորդությունը և 26-ամյա Արտյոմ Թումասյանի համար որպես խափանման միջոց կիրառել երկամսյա կալանքը:

Դատարանի վճռի հրապարակումից հետո Ա.Թումասյանը տեղափոխվել է Նուբարաշեն ՔԿՀ:

Հիշեցնենք, որ հոկտեմբերի 29-ին, ոստիկանության քննչական գլխավոր վարչության Արագածոտնի քննչական բաժին էր մեղայականով ներկայացել մի երիտասարդ:

Ինչպես ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, նշված երիտասարդը Աշտարակ քաղաքի Տիգրան Մեծի 25 շենքի բնակիչ, 26-ամյա Արտյոմ Թումասյանն է:

Նրա նկատմամբ հարուցվել էր քրեական գործ՝ ՀՀ քրօր.-ի 258 հոդվածի 4-րդ մասի հատկանիշներով:

Արտյոմ Թումասյանը հետախուզվում էր ոստիկանության Աշտարակի բաժնի կողմից, և նրա նկատմամբ Արագածոտնի մարզի ընդհանուր իրավասության դատարանը կայացրել էր խափանում կիրառելու վերաբերյալ որոշում' որպես խափանման միջոց ընտրելով կալանքը:

Ֆոտոլրագրող Գագիկ Շամշյանը հայտնեց, որ նշված երիտասարդը ոստիկանություն է ներկայացել մեղայականով, քանի որ ոստիկանության քննչական գլխավոր վարչության Արագածոտնի քննչական բաժնի և ոստիկանության Աշտարակի բաժնի աշխատակիցները նրա հետ բացատրական աշխատանք են կատարել, ինչից հետո էլ Ա.Թումասյանն ինքնակամ ներկայացել է ոստիկաններին:

Ա.Թումասյանը կասկածվում է հոկտեմբերի 25-ին' ժամը 17:00-ի սահմաններում, Աշտարակ քաղաքում գտնվող «Երամ» տաքսի ծառայությունում խուլիգանական արարքներ կատարելու մեջ:

Հիշեցնենք, որ ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, Աշտարակ քաղաքի Տիգրան Մեծ փողոցի վրա գտնվող «Երամ» տաքսի ծառայություն էր մտել և տաքսի ծառայության աշխատակիցների նկատմամբ ցուցաբերել խուլիգանական արարք, որից հետո իր մոտ եղած մարտական նռնակով սպառնացել էր, որ պայթեցնելու է տաքսի ծառայությունը:

Այդ ժամանակ քաղաքացին բռնություն է կիրառել տաքսի ծառայությունում աշխատող «Երամ» տաքսի ծառայության վարորդներից մեկի նկատմամբ, որը մարմնական վնասվածքներով այս պահին գտնվում է ոստիկանության Աշտարակի բաժնում, որից հետո այս անկոչ հյուրին փորձում են կարգի հրավիրել տաքսի ծառայության հարևանությամբ գտնվող խանութի աշխատակիցները, սակայն նա նույն արարքը ցուցաբերել է խանութի աշխատակիցների նկատմամբ՝ հարվածել է նրանց, որից հետո լքել է նշված վայրը և հեռացել :

Քիչ անց նա վերադարձել է և իր ձեռքին եղել է մարտական նռնակը, և այս անգամ սպառնացել է, որ նռնակը կպայթեցնի խանութում:

Շտապ դեպքի վայր են ժամանել ոստիկանության Աշտարակի բաժնի աշխատակիցները:

Այս պահին նշված հատվածում են գտնվում ոստիկանության Արագածոտնի մարզային վարչության աշխատակիցները՝ վարչության պետի տեղակալ Արմեն Հակոբյանի գլխավորությամբ:

Այստեղ է նաև ոստիկանության Աշտարակի բաժնի օպերատիվ խումբը՝ ոստիկանության Աշտարակի բաժնի պետ Արմեն Իսրայելյանի գլխավորությամբ:

Այստեղ են նաև Արտակարգ իրավիճակների նախարարության Արագածոտնի մարզի փրկարարական վարչության աշխատակիցները՝ փրկարարական վարչության պետ Շամիր Շամիրյանի գլխավորությամբ:

Դեպքի վայր ժամանած ոստիկանության աշխատակիցները տաքսի ծառայության և խանութի դիմացի մայթի բաց տարածքում հայտնաբերել են մարտական նռնակը:

Այն վնասազերծելու համար դեպքի վայր են ժամանել Պաշտպանության նախարարության սակրավորները:

Այս պահին սակրավորը կարողացավ վնասազերծել այդ մարտական նռնակը ու հիմա նռնակը փաթեթավորվում է քննիչի կողմից, հավանաբար դա կուղարկվի փորձաքրեագիտական կենտրոն, որտեղ կնշանակվի նռնակի փորձաքննություն:

Ոստիկանությունը ձեռնարկում է օպերատիվ քննչական-որոնողական աշխատանքներ՝ հայտնաբերելու համար այդ անձին, ով խուլիգանություն է կատարել և դիմել է փախուստի:

Այս պահին արդեն ոստիկանության քննչական գլխավոր վարչության Աշտարակի քննչական բաժանմունքում հարուցվել է քրեական գործ՝ 258 հոդվածի 4-րդ մասի՝ խուլիգանություն զենքի գոըրծադրմամբ և 235 հոդվածի 1-ին մասի՝ ապօրինի զենք-զինամթերք կրելու հատկանիշներով:

Քննիչի կողմից նշանակվել են մի շարք փորձաքննություններ, այդ թվում՝ ծեծված անձանց տրվել է դատաբժշկի ուղեգիր:

Լուսանկարները և տեսանյութը՝ Գագիկ Շամշյանի